ទឹកជំនន់ បានវាយប្រហារតំបន់ជាច្រើននៅលើពិភពលោកក្នុងឆ្នាំ ២០២៥នេះ ចាប់ពីតំបន់អាស៊ីអាគ្នេយ៍ រហូតដល់អាមេរិកខាងជើង និងតំបន់មជ្ឈិមបូព៌ា ។

លោក Pawan Bhattarai គឺជាសាស្រ្តាចារ្យនៅផ្នែកវិស្វកម្មសំណង់ស៊ីវិលនៃសាកលវិទ្យាល័យ Tribhuvan ស្ថិតក្នុងទីក្រុងកដ្ឋម៉ាន់ឌូ ប្រទេសនេប៉ាល់ និយាយប្រាប់កាសែត Al Jazeera ថា ពេញមួយឆ្នាំ ២០២៥ ទឹកជំនន់ធំៗជាច្រើន បានកើតឡើងនៅទូទាំងពិភពលោកធ្វើឲ្យការជន់លិចក្លាយជាគ្រោះថ្នាក់អាកាសធាតុដ៏អាក្រក់បំផុតនៅក្នុងឆ្នាំនេះ ។

ទឹកជំនន់បានវាយប្រហារប្រទេសឥណ្ឌូនេស៊ីក្នុងខែធ្នូនេះ បានសម្លាប់មនុស្សយ៉ាងហោច ៩៦១នាក់ នៅខេត្ត Aceh, North Sumatra និងខេត្ត West Sumatra ។ ភូមិដ្ឋានប្រជាពលរដ្ឋជាង ២០កន្លែង នៅខេត្តទាំង ៣ ត្រូវបានទឹកជំនន់ហូរនាំយកទៅទាំងស្រុង ។

ចំណែកឯមនុស្ស ២៧៦នាក់ ត្រូវបានសម្លាប់ផងដែរក្នុងទឹកជំនន់នៅប្រទេសថៃ ក្នុងខែធ្នូរនេះ ។ ទឹកជំនន់ធ្វើឲ្យប៉ះពាល់ដល់ខេត្តចំនួន ៨ នៅតំបន់ភាគកណ្តាល ៤ខេត្តនៅតំបន់ភាគខាងត្បូង និង ២ខេត្ត នៅតំបន់ភាគខាងជើង ។

កាលពីចុងខែវិច្ឆិកា ទឹកជំនន់ និងបំណាក់ដី បានសម្លាប់មនុស្សយ៉ាងហោច ៥៦នាក់ នៅប្រទេសស្រីលង្កា ពេលដែលព្យុះស៊ីក្លូន Ditwah បោកបងក់ឆ្លងកាត់ប្រទេសមួយនេះ ។

កាលពីខែតុលា ទឹកជំនន់បានវាយប្រហារប្រទេសម៉ិកស៊ិក ដោយបានសម្លាប់មនុស្សយ៉ាងហោច ៦៦នាក់ ។ ព្យុះត្រូពិក បណ្តាលឲ្យមានការជន់លិចនៅតាមបណ្តាលរដ្ឋចំនួន ៥ក្នុងប្រទេសមួយនេះ រួមទាំងរដ្ឋ Veracruz, Puebla, Hidalgo, Queretaro និងរដ្ឋ San Luis Potosi ។

ចន្លោះខែមិថុនា និងខែសីហា តំបន់ជាច្រើននៅក្នុងប្រទេសប៉ាគីស្ថាន បានជួបគ្រោះទឹកជំនន់បង្កឡើងដោយសារភ្លៀងធ្លាក់ខ្លាំង ។ មនុស្សជាង ៧០០នាក់ ត្រូវបានសម្លាប់នៅទូទាំងប្រទេស ។

ក្រុមអ្នកជំនាញនិយាយថា ទឹកជំនន់ កាន់តែអាក្រក់ទៅ បង្កឡើងដោយសារកត្តាជាច្រើនក្នុងឆ្នាំ ២០២៥ រួមទាំងកត្តាបម្រែបម្រួលអាកាសធាតុផងដែរ ៕