យោងតាមសេចក្តីព្រាងច្បាប់ដែលបានមើលឃើញដោយសារព័ត៌មាន AFP បានឲ្យដឹងថា ប្រទេសបារាំងនឹងរៀបចំផែនការថ្មីដើម្បីការពារកុមារពីការសំឡឹងមើលអេក្រង់ច្រើនពេក ដោយស្នើឱ្យហាមឃាត់ដំណើរការចូលប្រើប្រាស់បណ្តាញផ្សព្វផ្សាយសង្គមសម្រាប់កុមារអាយុក្រោម១៥ឆ្នាំ។

គំនិតផ្តួចផ្តើមនេះ ត្រូវបានគាំទ្រដោយប្រធានាធិបតី លោក Emmanuel Macron ដែលបាននិយាយថា សភាគួរតែចាប់ផ្តើមពិភាក្សាអំពីសំណើបែបនេះនៅក្នុងខែមករានេះ។

ប្រទេសអូស្ត្រាលី បានដាក់ចេញនូវបម្រាមបណ្តាញផ្សព្វផ្សាយសង្គមលើកុមារដែលមានអាយុក្រោម១៦ឆ្នាំ ដំបូងគេរបស់ពិភពលោក។

សេចក្តីព្រាងច្បាប់របស់ប្រទេសបារាំងនិយាយថា «ការសិក្សា និងរបាយការណ៍ជាច្រើនបច្ចុប្បន្នបញ្ជាក់ពីហានិភ័យផ្សេងៗដែលបណ្តាលមកពីការសំឡឹងអេក្រង់ឌីជីថលច្រើនពេកដោយក្មេងជំទង់»។

រដ្ឋាភិបាលនិយាយថា កុមារដែលចូលប្រើប្រាស់បណ្តាញអ៊ីនធឺណិតដោយគ្មានដែនកំណត់ត្រូវបានធ្វើឲ្យប៉ះពាល់ដោយ«ខ្លឹមសារមិនសមរម្យ» ហើយអាចទទួលរងដោយការយាយីតាមអ៊ីនធឺណិត ឬជួបប្រទះការផ្លាស់ប្តូរទម្លាប់នៃការចូលគេងរបស់ពួកគេ។