ក្រុមបាតុករអ៊ីរ៉ង់ដែលធ្វើបាតុកម្មដោយសារតែការលំបាកផ្នែកសេដ្ឋកិច្ច និងការធ្លាក់ចុះរូបិយប័ណ្ណ បានព្យាយាមទម្លាយចូលក្នុងអគាររដ្ឋាភិបាលមូលដ្ឋាន ខណៈភាពចលាចលនៅតែបន្ដដល់ថ្ងៃទីបួន។

ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃពុធ៣១ធ្នូសប្ដាហ៍នេះថា ក្រុមកុបករបានព្យាយាមសម្រុកចូលក្នុងអគាររដ្ឋបាលខេត្តក្នុងតំបន់នៅទីក្រុង Fasa ក្នុងខេត្ត Fars ភាគខាងត្បូង។ វីដេអូបានបង្ហាញពីក្រុមមនុស្សមួយក្រុមកំពុងព្យាយាមទម្លាយទ្វារអគារនោះ។ 

ទីភ្នាក់ងារសារព័ត៌មានពាក់កណ្តាលផ្លូវការ Tasnim បានដកស្រង់សម្តីមន្ត្រីមូលដ្ឋានមួយរូបថា សមាជិកកងកម្លាំងសន្តិសុខបីនាក់បានរងរបួសក្នុងអំឡុងពេលកើតហេតុ ខណៈជនវាយប្រហារ បួននាក់ត្រូវបានឃុំខ្លួន។

បាតុកម្មនេះបានឈានចូលដល់ថ្ងៃទីបួនជាប់គ្នានៃការតវ៉ាក្នុងប្រទេសអ៊ីរ៉ង់ ចាប់តាំងពីក្រុមអាជីវករនៅទីក្រុងតេអេរ៉ង់បានចេញតវ៉ាតាមដងផ្លូវកាលពីថ្ងៃអាទិត្យ ខណៈប្រាក់ រីអាល់ បានធ្លាក់ចុះដល់កម្រិតទាបបំផុតធៀបនឹងប្រាក់ដុល្លារអាមេរិក ដែលធ្វើឲ្យការលំបាកផ្នែកសេដ្ឋកិច្ចកាន់តែធ្ងន់ធ្ងរ ស្របពេលមានអតិផរណាខ្ពស់ និងការកើនឡើងលើការចំណាយជីវភាពរស់នៅប្រចាំថ្ងៃ។

ចាប់តាំងពីពេលនោះមក ការតវ៉ាបានរីករាលដាលដល់ទីក្រុងជាច្រើនទៀត។ ទីភ្នាក់ងារសារព័ត៌មាន IRNA របស់រដ្ឋអ៊ីរ៉ង់បានរាយការណ៍ថា កាលពីថ្ងៃអង្គារ និស្សិតបានចេញតវ៉ាតាមដងផ្លូវក្នុងទីក្រុងតេអេរ៉ង់ ខណៈការតវ៉ាក៏បានផ្ទុះឡើងនៅតាមសាកលវិទ្យាល័យ និងស្ថាប័ននានាក្នុងទីក្រុង Isfahan ទីក្រុង Yazd និងទីក្រុង Zanjan ផងដែរ៕