ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃពុធ (៣១ ធ្នូ) ថា រដ្ឋបាលរបស់លោក កំពុងតែដកកងកម្លាំងឆ្មាំជាតិចេញពីទីក្រុងមួយចំនួនដូចជា Chicago និង Los Angeles ព្រមទាំង Portland ប៉ុន្តែលោកបានព្រមាននៅក្នុងសារបង្ហោះលើបណ្តាញសង្គមថា កងកម្លាំងសហព័ន្ធនឹង «ត្រលប់ទៅវិញ» ប្រសិនបើអត្រាឧក្រិដ្ឋកម្មកើនឡើង។

ថ្នាក់ដឹកនាំមូលដ្ឋានក្នុងទីក្រុងទាំងនោះ និងសមាជិកបក្សប្រជាធិបតេយ្យ បានរិះគន់ថា ការដាក់ពង្រាយកងទ័ព នោះគឺមិនចាំបាច់ទាល់តែសោះ។ ពួកគេបានចោទរដ្ឋបាលលោក Trump ថាចាត់វិធានការសហព័ន្ធហួសហេតុ និងបំផ្លើសពីហេតុការណ៍ហិង្សាដាច់ដោយឡែក ដើម្បីបង្ហាញភាពត្រឹមត្រូវនៃការពង្រាយកងកម្លាំងរបស់ខ្លួន។

លោក Trump ដែលជាប្រធានាធិបតីមកពីបក្សសាធារណរដ្ឋ បាននិយាយថា ការដាក់ពង្រាយកងទ័ពនៅទីក្រុងជាច្រើនដូចជា Los Angeles ទីក្រុង Chicago ទីក្រុង Washington,ទីក្រុង Memphis និងទីក្រុង Portland គឺចាំបាច់ណាស់ ដើម្បីប្រយុទ្ធប្រឆាំងនឹងឧក្រិដ្ឋកម្ម និងការពារទ្រព្យសម្បត្តិ និងបុគ្គលិកសហព័ន្ធពីក្រុមបាតុករ។

ក្នុងសារបង្ហោះលើបណ្ដាញសង្គម លោក Trump បានសរសេរថា «រដ្ឋបាលកំពុងដកកងកម្លាំងឆ្មាំជាតិ ចេញពីទីក្រុង Chicago ក្រុង Los Angeles និង Portland ក្រោមការពិតដែលថាឧក្រិដ្ឋកម្មត្រូវបានកាត់បន្ថយយ៉ាងខ្លាំង ដោយមានកងកម្លាំងដ៏អស្ចារ្យទាំងនេះនៅក្នុងទីក្រុងទាំងនោះ»។ លោកសង្កត់ធ្ងន់ថា៖ «ពួកគេនឹងត្រលប់ទៅវិញ ប្រហែលជាក្នុងទម្រង់ខុសគ្នា និងខ្លាំងក្លាជាងនេះទៅទៀត នៅពេលឧក្រិដ្ឋកម្មចាប់ផ្តើមកើនឡើងជាថ្មី - ហើយនោះ គ្រាន់តែជាបញ្ហាពេលវេលាប៉ុណ្ណោះ!»៕