យោធាអ៊ីស្រាអែលកាលពីថ្ងៃពុធបានរាយការណ៍ថា ខ្លួនបានធ្វើការវាយប្រហារប្រហែល ២០.៩០០ លើក នៅទូទាំងមជ្ឈិមបូព៌ា ក្នុងឆ្នាំ ២០២៥ ដែលបានកំណត់គោលដៅសំខាន់លើតំបន់ហ្កាហ្សា អ៊ីរ៉ង់ ស៊ីរី និងលីបង់។

អ៊ីស្រាអែលបានបន្តការប្រយុទ្ធគ្នាច្រើនជួរមុខពេញមួយឆ្នាំ ដែលតម្រូវឲ្យមានការកេណ្ឌកងទ័ពបន្ថែម។ យោងតាមតួលេខដែលខ្លួនបានចេញផ្សាយនៅចុងឆ្នាំ ២០២៥ យោធាបានកេណ្ឌទាហានបម្រុងប្រហែល ៣០៦.៨៣០ នាក់ ដោយក្នុងនោះ ៥៤.០០០ នាក់ ដែលពីមុនត្រូវបានលើកលែងពីការបម្រើការងារ។

យោធាបាននិយាយថា នៅតំបន់ហ្កាហ្សា ជាកន្លែងដែលបទឈប់បាញ់បានចូលជាធរមាន នៅថ្ងៃទី ១០ ខែតុលា កងកម្លាំងអ៊ីស្រាអែល បានធ្វើការវាយប្រហារប្រហែល ១៩.៥៣០ លើក។

យោងតាមអាជ្ញាធរសុខាភិបាលនៅតំបន់ហ្កាហ្សា ការវាយប្រហាររបស់អ៊ីស្រាអែល បានសម្លាប់មនុស្សយ៉ាងហោចណាស់ ៤១៥ នាក់ និង ១.១៥២ នាក់ផ្សេងទៀត បានរងរបួស ចាប់តាំងពីថ្ងៃទី ១១ ខែតុលា។ មនុស្សសរុបចំនួន ៧១.២៦៩ នាក់ ត្រូវបានសម្លាប់ដោយការវាយប្រហាររបស់អ៊ីស្រាអែល ចាប់តាំងពីខែតុលា ឆ្នាំ ២០២៣។

កាលពីខែមិថុនា អ៊ីស្រាអែលបានចាប់ផ្តើមយុទ្ធនាការយោធារយៈពេល ១២ ថ្ងៃ ប្រឆាំងនឹងអ៊ីរ៉ង់ ដោយចាប់ផ្តើមនៅថ្ងៃទី ១៣ ខែមិថុនា ដោយប្រទេសទាំងពីរបានវាយប្រហារគ្នាទៅវិញទៅមកដោយមីស៊ីល ដែលជាការកើនឡើងភាពតានតឹងយ៉ាងខ្លាំង បន្ទាប់ពីជម្លោះស្រមោល និងជម្លោះដោយក្រុមអ្នកតំណាង អស់រយៈពេលជាច្រើនឆ្នាំ៕