រដ្ឋាភិបាលសាធារណរដ្ឋប្រជាធិបតេយ្យកុងហ្គោ (DRC) បាននិយាយកាលពីថ្ងៃពុធថា ជនស៊ីវិលជាង ១.៥០០នាក់ត្រូវបានសម្លាប់ក្នុងអំពើហិង្សាដែលកាន់តែខ្លាំងឡើងនៅក្នុងខេត្ត South Kivu ភាគខាងកើតរបស់ប្រទេស ចាប់តាំងពីដើមខែធ្នូ មក។

នៅក្នុងសេចក្តីថ្លែងការណ៍មួយ រដ្ឋាភិបាលបាននិយាយថា ការប្រយុទ្ធគ្នាបានកើនឡើងនៅក្នុងតំបន់ជាច្រើនរបស់ខេត្ត ជាពិសេសនៅកន្លែងដែលប្រតិបត្តិការប្រដាប់អាវុធបានបង្កឱ្យមានការជម្លៀសប្រជាជនទ្រង់ទ្រាយធំ។ ទន្ទឹមនឹងនេះ មនុស្សជាង៥សែននាក់ត្រូវបានបង្ខំឱ្យរត់ភៀសខ្លួនចេញពីលំនៅឋានរបស់ពួកគេ ដោយសារតែភាពអសន្តិសុខនៅតែបន្ត។

រដ្ឋាភិបាលនិយាយថា សមរភូមិជួរមុខបានផ្លាស់ប្តូរបន្តិចម្តងៗទៅភាគខាងត្បូង ដែលធ្វើឲ្យប៉ះពាល់ដល់តំបន់ជាច្រើននៅខេត្ត South Kivu។ អាជ្ញាធរបានសន្មតចំពោះការកើនឡើងនេះទៅលើក្រុមប្រដាប់អាវុធដែលកំពុងធ្វើប្រតិបត្តិការនៅក្នុងតំបន់ ដោយចោទប្រកាន់ពួកគេពីបទរំលោភលើការប្តេជ្ញាចិត្តដែលមានស្រាប់ និងច្បាប់មនុស្សធម៌អន្តរជាតិ។

រដ្ឋាភិបាល បានបញ្ជាក់ជាថ្មីនូវការប្តេជ្ញាចិត្តរបស់ខ្លួនក្នុងការស្តារឡើងវិញអំណាចរដ្ឋនៅទូទាំងប្រទេស និងស្វែងរកអ្នកទទួលខុសតាមរយៈបណ្តាញការទូត និងតុលាការ។ ភាគខាងកើតប្រទេសកុងហ្គោ បានប្រឈមទៅនឹងអស្ថិរភាពរាប់ទសវត្សរ៍មកហើយ ជាស្ថានភាពមួយដែលកាន់តែអាក្រក់ទៅៗចាប់តាំងពីការលេចចេញជាថ្មីនៃក្រុមឧទ្ទាមចលនាM23 កាលពីចុងឆ្នាំ ២០២១។ ទីក្រុង Kinshasa បានចោទប្រកាន់ដដែលៗថាប្រទេសជិតខាងរ៉្វាន់ដា បានគាំទ្រក្រុមនេះ ជាការចោទប្រកាន់ដែលទីក្រុង Kigali បានច្រានចោល។