នាយអគ្គសេនាធិការកងទ័ព លោកឧត្តមសេនីយ៍ទោ Eyal Zamir បាននិយាយថា អ៊ីស្រាអែលរំពឹងថា នឹងដកហូតអាវុធពីក្រុមយោធានៃចលនាសកម្មប្រយុទ្ធប៉ាឡេស្ទីនហាម៉ាស នៅឆ្នាំ ២០២៦នេះ។  

លោកត្រូវបានដកស្រង់សម្តីដោយសេវាសារព័ត៌មានកងទ័ពថា៖«ឆ្នាំ ២០២៦ នឹងក្លាយជាឆ្នាំដ៏សំខាន់មួយសម្រាប់ការបង្កើតការពិតនៃសន្តិសុខសម្រាប់រដ្ឋអ៊ីស្រាអែល។ ការប្តេជ្ញាចិត្តរបស់យើងក្នុងការដកហូតអាវុធពីក្រុមហាម៉ាស គឺដាច់ខាត។ យើងនឹងមិនអនុញ្ញាតឲ្យអង្គការភេរវកម្មហាម៉ាសស្តារសក្តានុពលរបស់ខ្លួនឡើងវិញ និងគំរាមកំហែងយើងទេ»។  

យោងតាមលោក Zamir បានឲ្យដឹងថា យោធាអ៊ីស្រាអែលកំពុងកាន់កាប់យ៉ាងរឹងមាំនូវទីតាំងជាច្រើននៅ តាមបណ្តោយខ្សែបន្ទាត់លឿង នៅក្នុងតំបន់ហ្កាហ្សា ដែលលោកឧត្តមសេនីយ៍ហៅថា «ព្រំដែនសន្តិសុខថ្មី»។ លោកបាននិយាយថា៖«ខ្សែបន្ទាត់លឿង គឺជាខ្សែការពារដ៏រឹងមាំដែលធានានូវការឆ្លើយតបប្រតិបត្តិការរហ័ស។ យើងនឹងបន្តធ្វើឲ្យ ក្រុមហាម៉ាសចុះខ្សោយតាមតម្រូវការ  កងទ័ពត្រូវតែប្រុងប្រយ័ត្ន និងត្រៀមខ្លួនសម្រាប់ការវិវត្តជាបន្តបន្ទាប់»។  

ដោយមានការសម្របសម្រួលពីអេហ្ស៊ីប កាតា សហរដ្ឋអាមេរិក និងទួរគី នៅថ្ងៃទី ០៩ ខែតុលា អ៊ីស្រាអែល និងក្រុមហាម៉ាស បានយល់ព្រមអនុវត្តដំណាក់កាលដំបូងនៃផែនការសន្តិភាព ដែលបានដាក់ចេញ ដោយប្រធានាធិបតីអាមេរិក ដូណាល់ ត្រាំ។ បទឈប់បាញ់នៅតំបន់ហ្កាហ្សា បានចូលជាធរមាន នៅថ្ងៃទី ១០ ខែតុលា។ ក្រោមកិច្ចព្រមព្រៀងនេះ កងទ័ពអ៊ីស្រាអែលបានដកថយទៅកាន់ខ្សែបន្ទាត់លឿង ដោយរក្សាទឹកដីជាង ៥០% នៃតំបន់ហ្កាហ្សាឲ្យស្ថិតនៅក្រោមការគ្រប់គ្រងរបស់ពួកគេ៕