អ្នកនាំពាក្យរបស់អង្គការសហប្រជាជាតិ (UN) បាននិយាយថា អគ្គលេខាធិការ UN លោក Antonio Guterres កាលពីថ្ងៃពុធ (ទី៣១ ខែធ្នូ ឆ្នាំ២០២៥) បានថ្កោលទោសចំពោះចំណាត់ការរបស់អ៊ីស្រាអែល ក្នុងការរារាំងមិនឲ្យមានអគ្គិសនី ឬទឹក នៅកន្លែងនានាដែលជាកម្មសិទ្ធិរបស់ទីភ្នាក់ងារជនភៀសខ្លួនប៉ាឡេស្ទីនរបស់ UN។

អ្នកនាំពាក្យរូបនេះបានលើកឡើងថា ចំណាត់ការនេះ នឹង «រារាំងបន្ថែមទៀត» ដល់លទ្ធភាពរបស់ទីភ្នាក់ងារនេះ ក្នុងការប្រតិបត្តិការ និងអនុវត្តសកម្មភាពនានា។

ខណៈដែលបានបន្ថែមថា UNRWA (ទីភ្នាក់ងារជំនួយ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន) គឺជាផ្នែកដ៏សំខាន់របស់ UN នោះ អ្នកនាំពាក្យនៃស្ថាប័នដ៏ធំរបស់ពិភពលោកមួយនេះ គឺលោក Stephane Dujarric បាននិយាយថា៖ «អនុសញ្ញា ស្តីពីបុព្វសិទ្ធិ និងអភ័យឯកសិទ្ធិរបស់ UN នៅតែអាចអនុវត្តបាន ចំពោះ UNRWA ដែលមានទ្រព្យសម្បត្តិ និងធនធាននានា ព្រមទាំងមន្ត្រី និងបុគ្គលិកដទៃទៀតរបស់ទីភ្នាក់ងារនេះ។ ទ្រព្យសម្បត្តិដែលត្រូវបានប្រើប្រាស់ដោយ UNRWA គឺមិនអាចរំលោភបំពានបានឡើយ»។

អគ្គស្នងការ UNRWA លោក Phillipe Lazzarini ក៏បានថ្កោលទោសចំណាត់ការនេះផងដែរ ដោយនិយាយថា វាគឺជាផ្នែកមួយនៃ «យុទ្ធនាការជាប្រព័ន្ធ ដើម្បីទម្លាក់គុណសម្បត្តិរបស់ UNRWA ដោយរាំងខ្ទប់តួនាទីដែលទីភ្នាក់ងារនេះកំពុងធ្វើ ដើម្បីកុំឲ្យបានផ្តល់ជំនួយដល់ជនភៀសខ្លួនប៉ាឡេស្ទីន»។

នៅឆ្នាំ២០២៤ សភាអ៊ីស្រាអែលបានអនុម័តច្បាប់ហាមប្រាមទីភ្នាក់ងារនេះមិនឲ្យមានប្រតិបត្តិការ នៅក្នុងប្រទេស និងហាមឃាត់មន្ត្រីមិនឲ្យមានទំនាក់ទំនងជាមួយទីភ្នាក់ងារនេះ។ UNRWA ប្រតិបត្តិការនៅទីក្រុងហ្សេរុយសាឡឹមខាងកើត ដែល UN ចាត់ទុកថា ជាដែនដីកាន់កាប់ដោយអ៊ីស្រាអែល។ អ៊ីស្រាអែលចាត់ទុកទីក្រុងហ្សេរុយសាឡឹមទាំងអស់ជាផ្នែកមួយនៃប្រទេស។ ទីភ្នាក់ងារនេះផ្តល់ការអប់រំ សុខភាព និងជំនួយដល់ប្រជាជនប៉ាឡេស្ទីនរាប់លាននាក់ នៅតំបន់ហ្កាហ្សា តំបន់ West Bank ប្រទេសហ្ស៊កដានី លីបង់ និងស៊ីរី៕