រដ្ឋបាលតំបន់ហ្កាហ្សា បានប៉ាន់ប្រមាណថា ការខាតបង់ដោយផ្ទាល់ដំបូង ក្នុងវិស័យសំខាន់ៗចំនួន ១៥ ក្នុងឆ្នាំ២០២៥ គឺស្ថិតក្នុងទំហំជាង ៣៣ពាន់លានដុល្លារ ខណៈដែលផលប៉ះពាល់ពីសង្រ្គាមប្រល័យពូជសាសន៍របស់អ៊ីស្រាអែលប្រឆាំងនឹងប៉ាឡេស្ទីន នៅតែបន្តមាន។

កាលពីថ្ងៃពុធ (ទី៣១ ខែធ្នូ ឆ្នាំ២០២៥) សេចក្តីថ្លែងការណ៍មួយពីការិយាល័យប្រព័ន្ធផ្សព្វផ្សាយរដ្ឋបាលតំបន់នេះ បានឲ្យដឹងថា ផលប៉ះពាល់ដោយសារការវាយប្រហារប្រល័យពូជសាសន៍ដែលធ្វើឡើងដោយអ៊ីស្រាអែល សម្រាប់រយៈពេល ២ឆ្នាំ នៅតែបន្តមាន ដោយបានបន្ថែមថា ការខាតបង់ដោយផ្ទាល់ដំបូង នៅក្នុងវិស័យសំខាន់ៗចំនួន ១៥ ត្រូវបានប៉ាន់ប្រមាណថា នឹងលើសពី ៣៣ពាន់លានដុល្លារ នៅឆ្នាំ២០២៥។

តាមរយៈសេចក្ដីថ្លែងការណ៍នោះ ការិយាល័យនេះបានឲ្យដឹងបន្តថា វិស័យកសិកម្ម ចិញ្ចឹមសត្វ និងជលផល ត្រូវបានបំផ្លិចបំផ្លាញទាំងស្រុង ហើយដីប្រហែល ៤៣.៩៨៥ហិចតា ដែលតំណាងឲ្យជាង ៨០ភាគរយនៃផ្ទៃដីកសិកម្ម ត្រូវបានខូចខាត។

ទាក់ទងនឹងការខូចខាតហេដ្ឋារចនាសម្ព័ន្ធ និងសេវាសាធារណៈ ការិយាល័យបានបញ្ជាក់ថា អណ្តូងទឹកជាង ៧០០អណ្ដូង ខ្សែបណ្តាញអគ្គិសនីប្រវែង ៣.០៨០គីឡូម៉ែត្រ ហើយបណ្តាញទឹក និងលូប្រវែង ៤០០គីឡូម៉ែត្រ ត្រូវបានបំផ្លាញនៅក្នុងការវាយប្រហាររបស់អ៊ីស្រាអែល។

សេចក្តីថ្លែងការណ៍បានបន្ថែមទៀតថា អ៊ីស្រាអែលបានបំផ្លាញផ្លូវចម្ងាយ ២.០០០គីឡូម៉ែត្រ នៅតំបន់ហ្កាហ្សា បំផ្លាញអគាររដ្ឋបាលចំនួន ១៥០ខ្នង ទីកន្លែងកីឡា និងវប្បធម៌ ហើយនិងទីតាំងបុរាណវត្ថុ និងប្រវត្តិសាស្ត្រចំនួន ២៥០កន្លែង។

ការិយាល័យនេះ ក៏បានគូសបញ្ជាក់ដែរថា កងទ័ពអ៊ីស្រាអែលបានវាយប្រហារតំបន់ហ្កាហ្សាជាមួយនឹងគ្រឿងផ្ទុះជាង ១១២.០០០តោន ពេញមួយឆ្នាំ២០២៥ ដោយបានបំផ្លាញ ៩០ភាគរយនៃហេដ្ឋារចនាសម្ព័ន្ធរបស់តំបន់ហ្កាហ្សា និងបានរឹបអូសកាន់កាប់ដោយបង្ខំ ៥៥ភាគរយនៃតំបន់ហ្កាហ្សា ដោយប្រើកម្លាំងយោធា៕