មនុស្ស ២២នាក់យ៉ាងតិច បានរងរបួស បន្ទាប់ពីជនសង្ស័យ ២នាក់ជិះម៉ូតូទៅគប់គ្រាប់បែកដៃចូលកន្លែងជប់លៀងឆ្នាំថ្មីនៅលើចិញ្ចើមផ្លូវ ក្នុងតំបន់ Barangay Dalapitan នៅទីក្រុង Matalam របស់ខេត្ត Cotabato នៅវេលាម៉ោង ១២ព្រឹក (ម៉ោងក្នុងស្រុក) នាថ្ងៃព្រហស្បតិ៍ (ទី១ ខែមករា ឆ្នាំ២០២៦) នេះ។

នគរបាលក្រុង Matalam បានឲ្យដឹងថា បុរសទាំង ២នាក់នេះ ដែលជិះម៉ូតូ ១គ្រឿង បានកាត់កន្លែងពិធីជប់លៀងលើចិញ្ចើមផ្លូវនោះ ហើយបានគប់គ្រាប់បែក ដែលគេជឿថា ជាគ្រាប់បែកដៃ ដោយផ្អែកលើអំបែងគ្រាប់ ដែលប្រមូលបានពីកន្លែងកើតហេតុនោះ។

ក្រុមស៊ើបអង្កេតកំពុងពិនិត្យមើលកាមេរ៉ាសុវត្តិភាព CCTV ដើម្បីព្យាយាមកំណត់អត្តសញ្ញាណ និងតាមចាប់ជនសង្ស័យ។ អភិបាលខេត្ត Cotabato លោកស្រី Emmylou Mendoza បានថ្កោលទោសយ៉ាងខ្លាំងចំពោះការវាយប្រហារនេះ។

លោកស្រី Mendoza បានលើកឡើងនៅក្នុងសេចក្តីថ្លែងការណ៍មួយថា៖ «អំពើហិង្សា មិនគួរកើតឡើងនៅក្នុងខេត្តនេះទេ»។ ហើយលោកស្រីបានបញ្ជាឲ្យនគរបាលក្រុង Matalam កំណត់អត្តសញ្ញាណជនសង្ស័យ និងនាំពួកគេមកកាត់ទោសឲ្យបាន។

ជាមួយគ្នានេះ លោកស្រី Mendoza ដែលបានប្តេជ្ញាបន្តផ្ដល់ជំនួយដល់ជនរងគ្រោះបន្ថែមនោះ បាននិយាយថា ជាសំណាងល្អដែលមិនមានអ្នកបាត់បង់ជីវិត៕