ប្រទេសទួរគីបានផ្តល់ជាផ្លូវការនូវការធ្វើដំណើរដោយមិនចាំបាច់មានទិដ្ឋាការដល់ពលរដ្ឋចិន ដែលកាន់លិខិតឆ្លងដែនធម្មតា សម្រាប់ទេសចរណ៍ និងដំណើរឆ្លងកាត់។ នេះបើយោងតាមក្រឹត្យរបស់ប្រធានាធិបតីដែលបានចេញផ្សាយរតាមសារព័ត៌មានរដ្ឋ Official Gazette កាលពីថ្ងៃពុធ (ទី៣១ ខែធ្នូ ឆ្នាំ២០២៥)។

គោលនយោបាយថ្មីដែលចុះហត្ថលេខាដោយលោកប្រធានាធិបតី Recep Tayyip Erdogan អនុញ្ញាតឲ្យភ្ញៀវទេសចរចិន ស្នាក់នៅក្នុងប្រទេសទួរគី រហូតដល់ ៩០ថ្ងៃ ក្នុងរង្វង់រយៈពេល ១៨០ថ្ងៃណាមួយ ដែលនឹងចូលជាធរមានចាប់ពីថ្ងៃទី២ ខែមករា ឆ្នាំ២០២៦។

ចំណាត់ការនេះ មានគោលបំណងពង្រឹងទំនាក់ទំនងទេសចរណ៍ និងពាណិជ្ជកម្ម រវាងប្រជាជាតិទាំង២ បន្ទាប់ពីមានការកើនឡើងយ៉ាងខ្លាំងនូវភ្ញៀវទេសចរចិន។

យោងតាមស្ថិតិផ្លូវការរបស់ទួរគី បានឲ្យដឹងថា ភ្ញៀវទេសចរចិនប្រមាណ ៤១០.០០០នាក់ បានទៅលេងកម្សាន្តនៅប្រទេសទួរគី ក្នុងឆ្នាំ២០២៤ ពោលគឺកើនឡើង ៦៥,១ភាគរយ បើធៀបនឹងឆ្នាំមុននោះ។

ហើយឥឡូវនេះ ប្រទេសចិនបានក្លាយជាទីផ្សារមួយ ក្នុងចំណោមទីផ្សារទេសចរណ៍ដែលរីកលូតលាស់លឿនបំផុតរបស់ប្រទេសទួរគី។

ទំនាក់ទំនងរបស់ទួរគី និងចិន កំពុងត្រូវបានពង្រឹងតាមរយៈការពង្រីកពាណិជ្ជកម្ម ទេសចរណ៍ និងការផ្លាស់ប្តូរវប្បធម៌ ដោយប្រទេសទាំង២ បានជំរុញយ៉ាងសកម្មនូវកិច្ចសហប្រតិបត្តិការសេដ្ឋកិច្ច និងការទូតឲ្យកាន់តែជិតស្និទ្ធ៕