នៅថ្ងៃព្រហស្បតិ៍ (ទី១ ខែមករា ឆ្នាំ២០២៦) នេះ ប្រទេសរុស្ស៊ីបានចោទប្រកាន់អ៊ុយក្រែនថា បានសម្លាប់មនុស្សយ៉ាងហោចណាស់ ២៤នាក់ ក្នុងនោះរួមមានទាំងកុមារផងដែរ អំឡុងការវាយប្រហារដោយយានដ្រូនលើសណ្ឋាគារ និងហាងកាហ្វេ ជាកន្លែងដែលជនស៊ីវិលកំពុងជួបជុំគ្នាអបអរឆ្នាំថ្មី នៅក្នុងតំបន់ Kherson ភាគខាងត្បូងនៃប្រទេសអ៊ុយក្រែនដែលគ្រប់គ្រងដោយរុស្ស៊ី។

យោធាអ៊ុយក្រែនដែលបានចោទប្រកាន់រុស្ស៊ីថា បានសម្លាប់ជនស៊ីវិលជាច្រើននាក់ នៅក្នុងការវាយប្រហាររបស់ខ្លួន លើទីក្រុងរបស់ប្រទេសអ៊ុយក្រែននោះ មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយតាមរយៈអ៊ីម៉ែល។

លោក Vladimir Saldo អភិបាលតំបន់ដែលត្រូវបានលើកបន្តុបដោយរុស្ស៊ី បានធ្វើការចោទប្រកាន់ដំបូង អំពីការវាយប្រហារនេះ ក្នុងសេចក្តីថ្លែងការណ៍មួយ។ ក្រសួងការបរទេសរុស្ស៊ី និងអ្នកនយោបាយជាន់ខ្ពស់រុស្ស៊ី ក្រោយមកបានចោទប្រកាន់អ៊ុយក្រែនថា បានធ្វើ «ការវាយប្រហារភេរវកម្ម»។

ទីភ្នាក់ងារសារព័ត៌មាន Reuters មិនអាចផ្ទៀងផ្ទាត់រូបថតបានភ្លាមៗ ជាអ្វីដែលសេវាសារព័ត៌មានរបស់លោក Saldo បានលើកឡើងថា ជាលទ្ធផលនៃការវាយប្រហារ ឬការចោទប្រកាន់នោះឡើយ។ យ៉ាងហោចណាស់សាកសពមនុស្សម្នាក់ ត្រូវបានគេមើលឃើញនៅក្នុងរូបភាពបិទបាំងដោយសន្លឹកផ្ទៃពណ៌ស។ អគារនេះបង្ហាញសញ្ញាថា អ្គិភ័យឆាបឆេះយ៉ាងសន្ធោសន្ធៅ ហើយមានឈាមប្រឡាក់នៅលើដី។

លោក Saldo បានឲ្យដឹងនៅក្នុងសេចក្តីថ្លែងការណ៍របស់លោកថា យានដ្រូនរបស់អ៊ុយក្រែនចំនួន ៣គ្រឿង បានវាយប្រហារទីតាំងនៃពិធីបុណ្យចូលឆ្នាំថ្មី នៅតំបន់ Khorly ដែលជាភូមិមួយនៅតំបន់ឆ្នេរ ជាអ្វីដែលលោកបានបញ្ជាក់ថា ជា «ការវាយប្រហារដោយចេតនា» ប្រឆាំងនឹងជនស៊ីវិល។

ចំណែកក្រសួងការបរទេសរុស្ស៊ី បានឲ្យដឹងថា ព័ត៌មានដំបូង បានបង្ហាញថា មនុស្ស ២៤នាក់យ៉ាងតិច រួមទាំងកុមារម្នាក់ផង ត្រូវបានសម្លាប់ ហើយមនុស្ស ៥០នាក់ទៀត បានរងរបួស ក្នុងនោះមានអនីតិជន ៦នាក់ កំពុងសម្រាកព្យាបាលនៅមន្ទីរពេទ្យ៕