កាលពីថ្ងៃទី១ ខែមករា កន្លងទៅ រុស្ស៊ី និងអ៊ុយក្រែន បានចោទប្រកាន់ដាក់គ្នាទៅវិញទៅមកថា បានកំណត់គោលដៅលើជនស៊ីវិលក្នុងអំឡុងពេលចូលឆ្នាំថ្មី ដោយទីក្រុងមូស្គូ បានរាយការណ៍ពីការវាយប្រហារដ៏បង្ហូរឈាមលើសណ្ឋាគារមួយក្នុងទឹកដីដែលខ្លួនកាន់កាប់ នៅភាគខាងត្បូងអ៊ុយក្រែន ខណៈទីក្រុងគីវ បាននិយាយថា មានការវាយប្រហារយ៉ាងទូលំទូលាយមួយផ្សេងទៀត លើបណ្ដាញផ្គត់ផ្គង់ថាមពលរបស់ខ្លួន។

របាយការណ៍យ៉ាងខឹងសម្បារទាំងនេះ កើតឡើងស្របពេលកិច្ចចរចាដ៏តឹងតែង ដែលត្រួតពិនិត្យដោយលោកប្រធានាធិបតីអាមេរិក Donald Trump និងមានបំណងបញ្ចប់សង្គ្រាមអាយុកាលជិត ៤ឆ្នាំមកនេះ។ ភាគីជម្លោះបានចោទដាក់គ្នាថា ប្រទេសម្ខាងទៀតកំពុងធ្វើគ្រប់យ៉ាងដែលអាចធ្វើបាន ដើម្បីជះឥទ្ធិពលដល់ចក្ខុវិស័យរបស់លោក Trump និងកំណត់លទ្ធផលចរចា។

ប្រធានាធិបតីអ៊ុយក្រែន លោក Volodymyr Zelenskyy បានសរសេរលើកម្មវិធីផ្ញើសារតេលេក្រាមថា «នៅថ្ងៃចូលឆ្នាំថ្មី រុស្ស៊ីមានចេតនានាំមកនូវសង្គ្រាម។ យានដ្រូនវាយប្រហារជាង ២០០គ្រឿង ត្រូវបានបាញ់ទៅកាន់អ៊ុយក្រែន នៅពេលយប់» ដោយបន្ថែមថា ហេដ្ឋារចនាសម្ព័ន្ធថាមពលក្នុងតំបន់ចំនួន៧ ទូទាំងអ៊ុយក្រែន ត្រូវបានកំណត់គោលដៅ។

រុស្ស៊ីបានចោទអ៊ុយក្រែនថាបានសម្លាប់មនុស្សយ៉ាងតិច ២៤នាក់ រួមទាំងកុមារម្នាក់ផងដែរ នៅក្នុងការវាយប្រហារយានដ្រូនលើសណ្ឋាគារ និងហាងកាហ្វេមួយកន្លែង ជាទីដែលជនស៊ីវិលកំពុងជួបជុំគ្នាក្នុងឱកាសឆ្នាំថ្មី នៅក្នុងតំបន់ Kherson ភាគខាងត្បូងអ៊ុយក្រែន ដែលគ្រប់គ្រងដោយរុស្ស៊ី។

យោធាអ៊ុយក្រែន — ដែលចោទទៅរុស្ស៊ីវិញថា បានសម្លាប់ជនស៊ីវិលជាច្រើននាក់ ក្នុងការវាយប្រហារលើទីក្រុងនានារបស់អ៊ុយក្រែន — បាននិយាយថា ខ្លួនកំណត់គោលដៅយោធា និងថាមពលប៉ុណ្ណោះ ប៉ុន្តែមិនបានលើកឡើងជាក់លាក់ជុំវិញការវាយប្រហារសណ្ឋាគារដែលត្រូវចោទប្រកាន់នោះទេ៕