រូបថតពីប្រព័ន្ធផ្សព្វផ្សាយរដ្ឋ KCNA ដែលចេញផ្សាយនៅថ្ងៃសុក្រ (២ មករា) នេះបានបង្ហាញឱ្យឃើញថា កូនស្រីរបស់មេដឹកនាំកូរ៉េខាងជើង គីម ជុងអ៊ុន (Kim Jong Un) គឺនាង ជូ អេ (Ju Ae) — ដែលទំនងជាកំពុងត្រូវបានរៀបចំឱ្យក្លាយជាអ្នកស្នងតំណែងមេដឹកនាំកូរ៉េខាងជើងបន្ទាប់ — បានអមដំណើរឪពុកម្តាយរបស់នាង ក្នុងដំណើរទស្សនកិច្ចជាសាធារណៈលើកដំបូងបំផុតទៅកាន់មតចេតិយរដ្ឋ ឬហៅថា ទីតម្កល់ធាតុ គុមស៊ូសាន (Kumsusan) ដើម្បីគោរពវិញ្ញាណក្ខន្ធអតីតមេដឹកនាំ។

នាង ជូ អេ បានបង្ហាញខ្លួនកាន់តែលេចធ្លោខ្លាំងនៅក្នុងប្រព័ន្ធផ្សព្វផ្សាយរដ្ឋ ក្នុងរយៈពេល ៣ឆ្នាំកន្លងមកនេះ ដែលជំរុញឱ្យមានការរំពឹងទុកដោយក្រុមអ្នកវិភាគ និងទីភ្នាក់ងារចារកម្មកូរ៉េខាងត្បូងថា រូបនាងអាចនឹងក្លាយជាមេដឹកនាំជំនាន់ទី៤ របស់ប្រទេសកូរ៉េខាងជើង។

រូបថតរបស់ទីភ្នាក់ងារព័ត៌មានរដ្ឋ KCNA បានបង្ហាញឱ្យឃើញថា លោក គីម ក៏ត្រូវបានអមដំណើរដោយភរិយារបស់លោក គឺលោកស្រី រី សូល ជូ (Ri Sol Ju) និងក្រុមមន្ត្រីជាន់ខ្ពស់ក្នុងដំណើរទស្សនកិច្ចនេះ កាលពីថ្ងៃទី១ ខែមករា ដោយមាននាង ជូ អេ ឈរនៅចន្លោះឪពុកម្តាយរបស់នាង នៅក្នុងសាលធំនៃមតចេតិយរដ្ឋ ឈ្មោះថា វិមានព្រះអាទិត្យ គុមស៊ូសាន។

យោងតាមប្រព័ន្ធផ្សព្វផ្សាយរដ្ឋបានឱ្យដឹងថា កាលពីថ្ងៃព្រហស្បតិ៍ នាង គីម ជូអេ — ដែលត្រូវគេជឿថាកើតនៅដើមទសវត្សរ៍ឆ្នាំ២០១០ ពោលគឺមានអាយុជាង ១០ឆ្នាំ — ក៏បានចូលរួមពិធីអបអរសាទរឆ្នាំថ្មី ២០២៦ នេះផងដែរ។ កាលពីខែកញ្ញា កន្លងទៅ នាងបានធ្វើដំណើរទៅកាន់ទីក្រុងប៉េកាំងជាមួយឪពុក ក្នុងដំណើរទស្សនកិច្ចជាសាធារណៈលើកដំបូងបំផុតនៅក្រៅប្រទេស៕