ប្រមុខយោធាជាន់ខ្ពស់មួយរូបរបស់រុស្ស៊ី កាលពីថ្ងៃព្រហស្បតិ៍ (១ មករា) បានប្រគល់ជូនអនុព័ន្ធយោធាសហរដ្ឋអាមេរិក នូវអ្វីដែលខ្លួនហៅថា ជាផ្នែកមួយនៃយានដ្រូនអ៊ុយក្រែន ដែលក្នុងនោះមានទិន្នន័យបង្ហាញថា យោធាអ៊ុយក្រែន នៅសប្តាហ៍នេះ បានកំណត់គោលដៅលើនិវេសនដ្ឋានប្រធានាធិបតីរុស្ស៊ី។

គួរឱ្យដឹងថា ទីក្រុងមូស្គូបានចោទទីក្រុងគីវ កាលពីថ្ងៃចន្ទសប្ដាហ៍នេះ ថាព្យាយាមវាយប្រហារនិវេសនដ្ឋានលោកប្រធានាធិបតី Vladimir Putin ក្នុងតំបន់ Novgorod ភាគខាងជើងរុស្ស៊ី ជាមួយនឹងយានដ្រូនវាយប្រហារចម្ងាយឆ្ងាយ ៩១គ្រឿង។ ក្រោយពីនោះ រុស្ស៊ីនិយាយថា ខ្លួននឹងពិនិត្យជំហរចរចាឡើងវិញ ក្នុងកិច្ចពិភាក្សាដែលកំពុងបន្តជាមួយអាមេរិក ស្តីពីការបញ្ចប់សង្គ្រាមអ៊ុយក្រែន។ ទាំងអ៊ុយក្រែន និងបណ្តាប្រទេសលោកខាងលិច បានបដិសេធការចោទប្រកាន់នោះ។

វីដេអូមួយដែលបង្ហោះលើឆានែលតេលេក្រាមក្រសួងការពារជាតិរុស្ស៊ី បានបង្ហាញឱ្យឃើញ លោកឧត្តមនាវីឯក Igor Kostyukov ប្រធាននាយកដ្ឋានសំខាន់នៃនាយសេនាធិការកងកម្លាំងប្រដាប់អាវុធរុស្ស៊ី ប្រគល់ទៅឱ្យអនុព័ន្ធយោធាអាមេរិក នូវអ្វីដែលលោកពិពណ៌នាថា ជាយន្តការគ្រប់គ្រងយានដ្រូនដែលត្រូវបានរកឃើញក្នុងចំណោមបំណែកយានដែលធ្លាក់។

លោក Kostyukov បាននិយាយថា៖ ទិន្នន័យបកស្រាយកូដនៃខ្លឹមសារអង្គចងចាំរបស់ឧបករណ៍បញ្ជារុករកយានដ្រូន ដែលអនុវត្តដោយអ្នកឯកទេសមកពីសេវាពិសេសរបស់រុស្ស៊ី បានបញ្ជាក់ដោយគ្មានការសង្ស័យថា គោលដៅនៃការវាយប្រហារនោះគឺជាបរិវេណអគារនិវេសនដ្ឋានរបស់ប្រធានាធិបតីរុស្ស៊ី ក្នុងតំបន់ Novgorod ៕