ប្រធានាធិបតីវ៉េណេស៊ុយអេឡា លោក Nicolas Maduro បាននិយាយកាលពីថ្ងៃព្រហស្បតិ៍ ១មករាសប្ដាហ៍នេះ ថា លោកពុំបានជួបសន្ទនាតាមទូរស័ព្ទលើកទីពីរជាមួយប្រធានាធិបតីអាមេរិក លោក Donald Trump ទេ ដោយបញ្ជាក់ថា ការសន្ទនាតែមួយគត់រវាងមេដឹកនាំទាំងពីរ បានធ្វើឡើងនៅថ្ងៃទី២១ វិច្ឆិកា និងមានរយៈពេលប្រហែល១០ នាទី។ 

ថ្លែងក្នុងបទសម្ភាសន៍ផ្ទាល់ លោក Maduro បាននិយាយថា ការហៅទូរស័ព្ទនេះត្រូវបានធ្វើឡើងក្នុងបរិយាកាសប្រកបដោយការគោរព និងស្និទ្ធស្នាល ប៉ុន្តែបានបន្ថែមថាសកម្មភាពបន្តបន្ទាប់ដែលធ្វើឡើងដោយសហរដ្ឋអាមេរិកមិនមែនជាមិត្តភាពទេ។ លោកបានបញ្ជាក់ជាថ្មីនូវបំណងប្រាថ្នារបស់លោកក្នុងការរក្សាទំនាក់ទំនងដោយសន្តិភាពជាមួយប្រជាជនអាមេរិក ដោយសង្កត់ធ្ងន់ថា លោកមិនចង់បានទម្រង់នៃការប្រឈមដាក់គ្នាខាងយោធា ឬសង្គ្រាមរវាងប្រទេសទាំងពីរនោះទេ។

ការអត្ថាធិប្បាយទាំងនេះបានកើតឡើងនៅពេលលោក Maduro បានថ្លែងសុន្ទរកថាឆ្នាំថ្មីលើកញ្ចក់ទូរទស្សន៍កាលពីថ្ងៃពុធសប្ដាហ៍នេះ ដែលលោកបាននិយាយថា ប្រទេសវ៉េណេស៊ុយអេឡាកំពុងស្ថិតក្នុងស្ថានភាពល្អបំផុត។លោកបានលើកឡើងពីកំណើនសេដ្ឋកិច្ចពិតប្រាកដរបស់ប្រទេសជាភស្តុតាងដែលបង្ហាញថា ប្រទេសវ៉េណេស៊ុយអេឡាកំពុងយកឈ្នះលើការវាយប្រហារ និងការបិទផ្លូវពីខាងក្រៅ។ 

យោធាអាមេរិកបាននិយាយកាលពីថ្ងៃពុធសប្ដាហ៍នេះថា ខ្លួនបានវាយប្រហារលើទូកដែលបានចោទថាដឹកគ្រឿងញៀនចំនួន៥គ្រឿងក្នុងពេលជាង២ថ្ងៃ ។ យោងតាមរដ្ឋបាលលោក Trump ការវាយប្រហារទាំងនេះ បាននាំឲ្យចំនួនទូករងការវាយប្រហារឡើងដល់៣៥ ហើយមនុស្សយ៉ាងហោចណាស់១១៥នាក់ស្លាប់ចាប់តាំងពីដើមខែកញ្ញា២០២៥មក៕