កាលពីថ្ងៃព្រហស្បតិ៍ (១ មករា) អាជ្ញាធរអ៊ីរ៉ង់ បានដំឡើងផ្ទាំងបដាជាច្រើនទូទាំងទីក្រុងតេអេរ៉ង់ ដោយសរសេរក្នុងន័យគំរាមកំហែងវាយប្រហារបន្ថែមទៀតប្រឆាំងនឹងអ៊ីស្រាអែល និងមូលដ្ឋានទ័ពអាមេរិក នៅប្រទេសកាតា ខណៈប្រព័ន្ធផ្សព្វផ្សាយរដ្ឋបានចេញផ្សាយរូបភាពនៃបដាទាំងនោះ ដែលបង្ហាញផែនទី និងទីតាំងនៃការវាយប្រហារក្នុងអំឡុងសង្គ្រាម ១២ថ្ងៃ កាលពីខែមិថុនា កន្លងទៅ។

ឃ្លាដែលសរសេរថា «វានឹងកើតឡើងម្តងទៀត» លេចឡើងនៅពីលើរូបភាពនៃទីតាំងដែលអ៊ីរ៉ង់ វាយប្រហារក្នុងអំឡុងសង្គ្រាមខែមិថុនានោះ រួមទាំងរូបភាពមូលដ្ឋានទ័ពអាកាស Nevatim របស់អ៊ីស្រាអែល រោងចក្រចម្រាញ់ប្រេងនិងថាមពល Haifa ក៏ដូចជាមូលដ្ឋានទ័ពអាកាស Al-Udeid របស់កាតា ដែលជាទីតាំងរបស់កងទ័ពអាមេរិកផងដែរ ដែរត្រូវបានកំណត់គោលដៅនៅក្នុងខែមិថុនា។

ក្រុមមន្ត្រីអ៊ីរ៉ង់ បានចាត់ទុកការវាយប្រហារទាំងនោះថាគ្រាន់តែជាផ្នែកដ៏តូចមួយប៉ុណ្ណោះនៃសមត្ថភាពមីស៊ីលដ៏ខ្លាំងក្លារបស់ប្រទេសនេះ ហើយបានព្រមានថា ការសងសឹកនាពេលអនាគត អាចមានលក្ខណៈទូលំទូលាយកាន់តែខ្លាំង។

ការតាំងផ្ទាំងបដាថ្មីនេះ បានកើតឡើងបន្ទាប់ពីសុន្ទរកថាថ្មីៗរបស់លោកប្រធានាធិបតីអាមេរិក Donald Trump ស្តីពីការគាំទ្ររបស់លោកចំពោះការវាយប្រហាររបស់អ៊ីស្រាអែល លើទីតាំងមីស៊ីល ឬនុយក្លេអ៊ែរក្នុងទឹកដីអ៊ីរ៉ង់ ដែលជំរុញឱ្យក្រុមមន្ត្រីជាន់ខ្ពស់ថ្នាក់រដ្ឋ និងយោធានៅទីក្រុងតេអេរ៉ង់ ចេញសារប្រឆាំង និងគំរាមកំហែងបកទៅវិញជាបន្តបន្ទាប់៕