រដ្ឋមន្ត្រីក្រសួងការពារជាតិអ៊ីស្រាអែល លោក Israel Katz កាលពីថ្ងៃពុធ បានអំពាវនាវឲ្យយោធាត្រៀមខ្លួនសម្រាប់ការវាយប្រហារទ្រង់ទ្រាយធំដែលអាចកើតមានលើកន្លែងតាំងទីលំនៅ នៅតំបន់វេសបែង  ( West Bank) «តាមរបៀប»នៃការឈ្លានពានភាគខាងត្បូងអ៊ីស្រាអែលដឹកនាំដោយក្រុមហាម៉ាស នៅថ្ងៃទី ០៧ ខែតុលា ឆ្នាំ ២០២៣ ពីតំបន់ហ្កាហ្សា។

ការព្រមានពីលោក Katz បានកើតឡើង បន្ទាប់ពីលោកបានទៅទស្សនកិច្ចតំបន់វេសបែង និងបានជួបជាមួយមេបញ្ជាការជាន់ខ្ពស់ រួមទាំងមេបញ្ជាការនៃទីបញ្ជាការកណ្តាល លោកឧត្តមសេនីយ៍ Avi Bluth ដែលមុននេះបានប្រកាសថា កងកម្លាំងការពារអ៊ីស្រាអែល (IDF) ត្រូវតែត្រៀមខ្លួនសម្រាប់ «សង្គ្រាមដែលមិននឹកស្មានដល់»។

យោងតាម IDF បានឲ្យដឹងថា លោក Bluth បាននិយាយថា៖«សេណារីយោមូលដ្ឋានដែលយើងត្រូវតែត្រៀមខ្លួន គឺការត្រៀមខ្លួនសម្រាប់សង្គ្រាមដែលមិននឹកស្មានដល់»។ «យើងត្រូវបានតម្រូវឲ្យរក្សាការត្រៀមខ្លួននិងប្រុងប្រយ័ត្នកម្រិតខ្ពស់ ខណៈពេលដែលប្រើប្រាស់ពេលវេលា ដើម្បីពង្រឹងមូលដ្ឋានគ្រឹះវិជ្ជា ជីវៈរបស់យើង»។

លោក Katz និងលោក Bluth មិនបានផ្តល់ព័ត៌មានលម្អិតបន្ថែមអំពីអ្វីដែលជំរុញឲ្យមានការព្រមានរបស់ពួកគេអំពីតំបន់វេសបែង ជាកន្លែងដែលការវាយប្រហារភេរវកម្មប៉ាឡេស្ទីន និងអំពើហិង្សារបស់អ្នកតាំងទីលំនៅ បានកើនឡើង ចាប់តាំងពីការវាយប្រហាររបស់ក្រុមហាម៉ាសលើអ៊ីស្រាអែលកាលពីជាងពីរឆ្នាំមុន។ វាមិនដូចតំបន់ហ្កាហ្សា ដែលបច្ចុប្បន្នត្រូវបានបែងចែករវាងការគ្រប់គ្រងរបស់អ៊ីស្រាអែល និងក្រុមហាម៉ាសទេ កងកម្លាំងការពារជាតិអ៊ីស្រាអែល (IDF) រក្សាការគ្រប់គ្រងយោធាលើតំបន់វេសបែង និងធ្វើ ប្រតិបត្តិការប្រឆាំងភេរវកម្មស្ទើរតែរាល់ថ្ងៃ នៅទីនោះ៕