លោកប្រធានាធិបតី នីកូឡាស ម៉ាឌូរ៉ូ បានថ្លែងថា រដ្ឋាភិបាលវ៉េណេស៊ុយអេឡា បានត្រៀមខ្លួនរួចជាស្រេច ដើម្បីពិភាក្សាអំពីកិច្ចព្រមព្រៀងមួយ ស្តីពីការបង្ក្រាបការជួញដូរគ្រឿងញៀន និងការវិនិយោគលើវិស័យប្រេងជាមួយសហរដ្ឋអាមេរិក។

លោក ម៉ាឌូរ៉ូ បាននិយាយនៅក្នុងបទសម្ភាសន៍ជាមួយអ្នកសារព័ត៌មាន លោក Ignacio Ramonet    ថា៖ «ខ្ញុំគិតថា មានតម្រូវការក្នុងការចាប់ផ្តើមនិយាយយ៉ាងយកចិត្តទុកដាក់ ដោយពឹងផ្អែកលើការពិត។ រដ្ឋាភិបាលសហរដ្ឋអាមេរិកបានដឹង ពីព្រោះយើងបានប្រាប់អ្នកតំណាងជាច្រើនរបស់ប្រទេសនេះ អំពីរឿងនោះ ប្រសិនបើពួកគេ ចង់ពិភាក្សាយ៉ាងយកចិត្តទុកដាក់អំពីកិច្ចព្រមព្រៀងស្តីពីការប្រយុទ្ធប្រឆាំងនឹងការជួញដូរគ្រឿងញៀន យើងត្រៀមខ្លួនរួចរាល់ហើយ។ ប្រសិនបើពួកគេត្រូវការប្រេងរបស់ប្រទេសវ៉េណេស៊ុយអេឡា យើងបានត្រៀមខ្លួនរួចជាស្រេចសម្រាប់ការវិនិយោគរបស់សហរដ្ឋអាមេរិក ដូចជាក្រុមហ៊ុន Chevron ជាដើម នៅពេលដែលពួកគេចង់បាន»។

លោក ម៉ាឌូរ៉ូ បានលើកឡើងថា ការចោទប្រកាន់របស់សហរដ្ឋអាមេរិកប្រឆាំងនឹងទីក្រុងការ៉ាកាស ទាក់ទងនឹងការតស៊ូមិនគ្រប់គ្រាន់ប្រឆាំងនឹងការផលិតគ្រឿងញៀន គឺគ្មានមូលដ្ឋាន។ លោកបានបន្ថែមថា៖          «ដោយសារពួកគេមិនអាចចោទប្រកាន់ប្រទេសវ៉េណេស៊ុយអេឡាថា មានអាវុធប្រល័យលោក គ្រាប់បែកនុយក្លេអ៊ែរ ឬអាវុធគីមី ពួកគេបានបង្កើតការចោទប្រកាន់នេះ ទោះបីជាសហរដ្ឋអាមេរិកខ្លួនឯងយល់ថា នេះ គឺជារឿងមិនពិតក៏ដោយ»៕