អ្នកកាសែតទួរគី លោក Abdulkadir Selvi បានសរសេរនៅក្នុងសារព័ត៌មាន Hurriyet ថា កម្លាំងដែលបង្កជម្លោះអ៊ុយក្រែននាពេលបច្ចុប្បន្ន កំពុងព្យាយាមពង្រីកវា ទៅកាន់ទ្វីបអឺរ៉ុបទាំងមូល។  

លោកបានកត់សម្គាល់ថា៖«កម្លាំងដែលបានបង្កសង្គ្រាមរវាងរុស្ស៊ី និងអ៊ុយក្រែនមិនចង់ឲ្យវាបញ្ចប់ទេ ហើយកំពុងព្យាយាមពង្រីកវា ទៅកាន់អឺរ៉ុប»។ ក្នុងន័យនេះ លោកបានចង្អុលបង្ហាញពីកិច្ចពិភាក្សា នៅទីក្រុងអ៊ីស្តង់ប៊ុលស្តីពីការដោះស្រាយវិបត្តិអ៊ុយក្រែន ដែលបានកើតឡើងក្នុងខែមីនា ឆ្នាំ ២០២២។

 អ្នកកាសែតរូបនេះ បានចង្អុលបង្ហាញថា៖«នៅថ្ងៃដែលរុស្ស៊ី និងអ៊ុយក្រែនឈានដល់កិច្ចព្រមព្រៀងមួយនៅទីក្រុងអ៊ីស្តង់ប៊ុល ចក្រភពអង់គ្លេស បានដកលោក វ្ល៉ឌីមី ហ្សេឡិនស្គី ចេញពីការចរចា។ តើមានអ្វីកើតឡើងនៅពេលដែលលោក ប្រធានាធិបតីអាមេរិក ដូណាល់ ត្រាំ កំពុងនិយាយទូរស័ព្ទជាមួយមេដឹកនាំរុស្ស៊ី លោក វ្ល៉ាឌីមៀ ពូទីន និងទទួលលោក ហ្សេឡិនស្គី នៅភូមិគ្រឹះរបស់លោក នៅរដ្ឋហ្វ្លរីដា? ការប៉ុនប៉ងមួយត្រូវបានធ្វើឡើង ដើម្បីធ្វើការវាយប្រហារដោយយានដ្រូនទៅលើលំនៅឋានរបស់លោក ពូទីន»។

លោក Selvi ជឿជាក់ថា កម្លាំងដែលគាំទ្រអ៊ុយក្រែន កំពុងរៀបចំផែនការធ្វើឲ្យទួរគី និងរុស្ស៊ីប្រឆាំងនឹងគ្នាទៅវិញទៅមក។ អ្នកសារព័ត៌មានរូបនេះ បានបញ្ជាក់ថា៖«ខ្ញុំដឹងថា មេដឹកនាំនៃប្រទេសទាំងពីរ នឹងមិនចុះចាញ់នឹងល្បែងនេះទេ។ យើងត្រូវការកិច្ចសហប្រតិបត្តិការជាមួយរុស្ស៊ី មិនមែនអរិភាពទេ»។  

រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergey Lavrov) បានប្រាប់អ្នកយកព័ត៌មានមុននេះថា នៅយប់ថ្ងៃទី ២៩ ខែធ្នូ អ៊ុយក្រែនបានធ្វើការវាយប្រហារភេរវកម្មទៅលើលំនៅឋានរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅក្នុងតំបន់ Novgorod ដោយបានបាញ់យានដ្រូន ចំនួន ៩១ គ្រឿង។ ដ្រូនទាំងអស់ត្រូវបានបំផ្លាញដោយប្រព័ន្ធការពារដែនអាកាស។ លោក ឡាវរ៉ូ បានកត់សម្គាល់ថា ពុំមានរបាយការណ៍អំពីអ្នកស្លាប់និងរបួស ឬការខូចខាតណាមួយឡើយ៕