​ស្នូកឃ័រ៖ ​ជើងឯក ៤សម័យ Ronnie O’Sullivan បាន​ធ្លាក់​ពី​ការប្រកួត​ស្នូកឃ័រ​ពានរង្វាន់ Welsh Open ហើយ​នៅ​ត្រឹម​វគ្គ ១៦នាក់​ចុងក្រោយ​បន្ទាប់ពី​បរាជ័យ​ក្រោម​ស្នាដៃ​កីឡាករ Ricky Walden​។​ ​​ក្តី​សង្ឃឹម​របស់ Ronnie O’Sullivan ដែល​ចង់​ឈ្នះ​ពាន Welsh Open ឱ្យ​ស្មើ​កំណត់ត្រា​នោះបាន​បញ្ចប់​ បើទោះជា​តាម​ពី​ក្រោយពី​ការ​នាំ​មុខ​របស់ Ricky Walden ៣-១ហ្វ្រេ​ម​រហូតដល់​ស្មើគ្នា ៣-៣ ក៏ដោយ Ricky Walden បាន​យកឈ្នះ​នៅ​ហ្វ្រេ​ម​កាត់សេចក្តី​។

​​កីឡាករ​វ័យ ៣៩ឆ្នាំ Ricky Walden ដែល​ធ្លាប់មាន​បញ្ហា​របួស​ខ្នង​រ៉ាំរ៉ៃ​នោះ បាន​បន្ត​ទំរង់​លេង​អស្ចារ្យ​របស់ខ្លួនដោយ​ឡើងដល់​វគ្គ ៨នាក់​ចុងក្រោយ​នៃ​ពាន​លំដាប់ Ranking ជា​លើក​ទី៥ រដូវ​កាល​នេះ​។ ​​ចំណែក Ronnie O’Sullivan មុន​ឡើង​មកដល់​វគ្គ​នេះបាន​យកឈ្នះ​ជើង​ខ្លាំង​ចិន Ding Junhui នៅ​វគ្គ ៣២នាក់​ចុងក្រោយ​។ ​​ដូច្នេះ​នៅ​វគ្គ ៨នាក់​ចុងក្រោយ Welsh Open រកឃើញ​អស់ហើយ​រួមមាន​ជំនួប​ជើង​ខ្លាំង​ទាំងពីរ Judd Trump និង Neil Robertson, កីឡាករ​ចិន Zhang Anda ជួប​កីឡាករ​អ៊ីរ៉ង់ Hossein Vafaei, Ali Carter ជួប Jack Lisowski និង Ricky Walden ជួប Joe Perry៕

​អត្ថបទ​៖​នាង សុភា​វុ​ធ