ប្រព័ន្ធផ្សព្វផ្សាយ ក្នុងស្រុក បានរាយការណ៍ថា នាយករដ្ឋមន្ត្រីប៉ូឡូញ លោក Donald Tusk បានប្រកាសថា ឆ្នាំ២០២៦ គឺជា «ពេលវេលានៃការបង្កើនល្បឿនរបស់ប៉ូឡូញ» ដោយសន្យាថា នឹងកសាងនូវ «កងទ័ពដ៏ខ្លាំងបំផុត នៅអឺរ៉ុប» ជំរុញការវិនិយោគហេដ្ឋារចនាសម្ព័ន្ធ និងប្រកាន់ជំហរតឹងរ៉ឹង ចំពោះឧក្រិដ្ឋកម្ម។

ប្រព័ន្ធផ្សព្វផ្សាយ TVP World បានរាយការណ៍កាលពីថ្ងៃព្រហស្បតិ៍ (ទី១ ខែមករា ឆ្នាំ២០២៦) ថា ក្នុងសុន្ទរកថាឆ្នាំថ្មី លោក Tusk បានលើកឡើងថា រដ្ឋាភិបាលរបស់លោក នឹងពន្លឿនការពង្រីកកម្លាំងយោធា ចាប់ផ្តើមគម្រោងហេដ្ឋារចនាសម្ព័ន្ធសំខាន់ៗ និងបន្តនូវអ្វីដែលលោកហៅថា «ការធ្វើឲ្យទៅជាភាពជាប៉ូឡូញឡើងវិញ» និងការកសាងឡើងវិញនូវឧស្សាហកម្មសំខាន់ៗ ក្នុងនោះរួមទាំងវិស័យការពារជាតិផងដែរ។

លោក Tusk បានបញ្ជាក់ថា៖ «យើងនឹងពន្លឿនការសាងកម្លាំងទ័ពដ៏ខ្លាំងបំផុត នៅអឺរ៉ុប។ យើងនឹងពន្លឿនការវិនិយោគហេដ្ឋារចនាសម្ព័ន្ធសំខាន់ៗ។ នេះនឹងក្លាយជាឆ្នាំដណ្ដើមជ័យជម្នះយ៉ាងឆាប់រហ័សនៃសមុទ្របាល់ទិក»។ លោកក៏បានប្រកាសផងដែរពីផែនការដាក់ចេញច្បាប់ ដ៏តឹងរឹង «ប៉ូឡូញទី១» នៅក្នុងលទ្ធកម្មសាធារណៈ។

លើសពីនោះទៀត លោក Tusk បានសន្យាថា នឹងចាត់វិធានការយ៉ាងតឹងរ៉ឹង ប្រឆាំងនឹងឧក្រិដ្ឋកម្ម ដោយបាននិយាយថា អាជ្ញាធរនឹង «អនុវត្តយ៉ាងតឹងរ៉ឹង» លើឧក្រិដ្ឋជន «គ្រប់វិស័យទាំងអស់» ក្នុងនោះរួមទាំងឈ្មួញគ្រឿងញៀន អ្នកនយោបាយពុករលួយ និងអ្វីដែលលោកបានពិពណ៌នាថា ជាពួកសកម្មប្រយុទ្ធគាំទ្ររុស្ស៊ី។

ដោយបានឆ្លុះបញ្ចាំងពីឆ្នាំ២០២៥ លោក Tusk បានពណ៌នាកាលពីឆ្នាំមុនថា ជាចំណុចរបត់មួយ សម្រាប់ប្រទេស ទោះបីជាមានអស្ថិរភាពពិភពលោកក៏ដោយ៕