កងទ័ពអ៊ុយក្រែន នៅថ្ងៃសុក្រ (ទី២ ខែមករា ឆ្នាំ២០២៦) នេះ បានបញ្ជាក់ថា ខ្លួនវាយលុកតែលើ «គោលដៅយោធា» ប៉ុណ្ណោះ មួយថ្ងៃបន្ទាប់ពីរុស្ស៊ីបានចោទប្រកាន់ទីក្រុងគីវថា បានវាយប្រហារដោយយានដ្រូនលើសណ្ឋាគារ និងហាងកាហ្វេមួយកន្លែង នៅតំបន់កាន់កាប់ភាគខាងត្បូងរបស់អ៊ុយក្រែន ដោយបានបណ្ដាលឲ្យមនុស្ស ២៧នាក់យ៉ាងតិចស្លាប់។

អាជ្ញាធរដែលត្រូវបានលើកបន្តុបដោយរុស្ស៊ី នៅតំបន់ Kherson ភាគខាងត្បូងអ៊ុយក្រែន បាននិយាយថា អ្នកដែលត្រូវបានសម្លាប់ គឺជាអ្នកដែលជួបជុំអបអរឆ្នាំថ្មី ហើយអ្នកស្លាប់ ២នាក់ជាកុមារ ដោយពណ៌នាហេតុការណ៍នេះថា ជា «អំពើភេរវកម្ម»។

ប្រភពមួយនៅក្នុងកងកម្លាំងការពារជាតិរបស់ប្រទេសអ៊ុយក្រែន បានអះអាងថា ការវាយប្រហារមួយ បានកើតឡើង ប៉ុន្តែបាននិយាយថា ការវាយប្រហារនេះផ្តោតលើកន្លែងប្រមូលផ្តុំយោធាដែលត្រូវបានបិទមិនឲ្យជនស៊ីវិលចេញ-ចូល។ សណ្ឋាគារដែលទីក្រុងមូស្គូប្រាប់ថា ការវាយប្រហារដែលបានកើតឡើងនោះ ស្ថិតនៅតំបន់ Khorly ជាទីក្រុងរមណីយដ្ឋានសមុទ្រខ្មៅដែលកងទ័ពរុស្ស៊ីបានកាន់កាប់តាំងពីដើមឆ្នាំ២០២២ មក។

នៅក្នុងការអត្ថាធិប្បាយទៅកាន់សារព័ត៌មាន អ្នកនាំពាក្យកងទ័ពអ៊ុយក្រែន លោក Dmytro Lykhoviy បានចោទប្រកាន់រុស្ស៊ីថា បានប្រើពាក្យសម្ដីបង្កាច់បង្ខូច និងសេចក្តីថ្លែងការណ៍មិនពិតម្តងហើយម្តងទៀត។ លោកបាននិយាយថា «កងកម្លាំងការពាររបស់អ៊ុយក្រែន ប្រកាន់ខ្ជាប់នូវបទដ្ឋាននៃច្បាប់មនុស្សធម៌អន្តរជាតិ ហើយវាយប្រហារជាពិសេសតែទៅលើគោលដៅយោធារបស់សត្រូវប៉ុណ្ណោះ»។

ការចោទប្រកាន់នេះកើតឡើង នៅក្នុងពេលដ៏សំខាន់មួយ ក្នុងជម្លោះរយៈពេលជិត ៤ឆ្នាំ ដែលជាការសម្លាប់មនុស្សច្រើនបំផុត នៅលើដីអឺរ៉ុប ចាប់តាំងពីសង្គ្រាមលោកលើកទី២។ ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅក្នុងសុន្ទរកថានាថ្ងៃចូលឆ្នាំសកលកាលពីល្ងាចថ្ងៃពុធថា កិច្ចព្រមព្រៀងសន្តិភាព ដែលសម្របសម្រួលដោយសហរដ្ឋអាមេរិក បានរួចរាល់ «៩០ភាគរយ» ទោះបីជាបញ្ហាសំខាន់បំផុត ពាក់ព័ន្ធនឹងដែនដី នៅតែមិនទាន់ដោះស្រាយក៏ដោយ៕