តុលាការកូរ៉េខាងត្បូងបានចេញដីកាចាប់ខ្លួនថ្មី ចំពោះអតីតប្រធានាធិបតី លោក Yoon Suk Yeol នៅថ្ងៃសុក្រ (ទី២ ខែមករា ឆ្នាំ២០២៦) នេះ ដោយបន្ថែមពេលវេលាឃុំខ្លួនលោក ខណៈដែលរូបលោកត្រូវប្រឈមនឹងបទចោទ ពាក់ព័ន្ធនឹងការប៉ុនប៉ងចេញច្បាប់អាជ្ញាសឹក កាលពីឆ្នាំ២០២៤។

រដ្ឋអាជ្ញាបានចោទប្រកាន់លោក Yoon ជាផ្លូវការ កាលពីខែវិច្ឆិកាឆ្នាំមុន ជុំវិញការចោទប្រកាន់ជាច្រើនពីបទជួយដល់សត្រូវ ដោយចោទប្រកាន់ថា លោកបានបញ្ជាឲ្យបង្ហោះយានដ្រូន នៅលើដែនដីរបស់កូរ៉េខាងជើង ក្នុងគោលបំណងពង្រឹងកិច្ចប្រឹងប្រែងរបស់លោក ដើម្បីប្រកាសការគ្រប់គ្រងដោយយោធា។

ដីកាចាប់ខ្លួន សម្រាប់ករណីនោះ នឹងត្រូវផុតកំណត់នៅថ្ងៃទី១៨ ខែមករា ប៉ុន្តែដីកាថ្ងៃទី២ ខែមករានេះ ពន្យាពេលអតិបរមា ៦ខែ។ មន្ត្រីម្នាក់មកពីតុលាការកណ្តាលក្រុងសេអ៊ូល បានប្រាប់សារព័ត៌មានថា៖ «ដីកានេះត្រូវបានចេញដោយសារមានក្ដីបារម្ភថា រូបលោកអាចបំផ្លាញភស្តុតាង»។

លោក Yoon ត្រូវបានឃុំខ្លួនអស់រយៈពេលជាច្រើនខែមកហើយ ខណៈដែលត្រូវប្រឈមនឹងការកាត់ទោសបទល្មើសព្រហ្មទណ្ឌជាច្រើន។ លោកបានផ្អាកការគ្រប់គ្រងស៊ីវិល នៅក្នុងប្រទេសកូរ៉េខាងត្បូង រយៈពេលខ្លី កាលពីថ្ងៃទី៣ ខែធ្នូ ឆ្នាំ២០២៤ ជាហេតុការណ៍ដែលបានជំរុញឲ្យមានការតវ៉ាដ៏ធំ និងការប៉ះទង្គិចនៅក្នុងសភា។ លោកត្រូវបានដកចេញពីតំណែងជាផ្លូវការ កាលពីខែមេសាឆ្នាំមុន។

គួរបញ្ជាក់ថា លោក Yoon បានក្លាយជាប្រធានាធិបតីក្នុងតំណែងដំបូងគេរបស់ប្រទេសដែលត្រូវបានចាប់ខ្លួន នៅពេលដែលលោកត្រូវបានឃុំខ្លួន ក្នុងខែមករា ឆ្នាំ២០២៥ បន្ទាប់ពីមិនព្រមឲ្យចាប់ចាប់ខ្លួនជាច្រើនសប្តាហ៍ ដោយប្រើប្រាស់ក្រុមការពារសន្តិសុខប្រធានាធិបតីរបស់លោក ដើម្បីរារាំងការអនុវត្តច្បាប់នេះ៕