អ្នកនាង Angelina Jolie បានទៅកាន់ច្រកឆ្លងកាត់ព្រំដែន Rafah នៅខាងប្រទេសអេហ្ស៊ីប នាថ្ងៃសុក្រ (ទី២ ខែមករា ឆ្នាំ២០២៦) ដែលជាផ្នែកមួយនៃដំណើរមនុស្សធម៌ សម្រាប់អ្នកស្រុកហ្កាហ្សា។

តារាស្រីសញ្ជាតិអាមេរិករូបនេះ ត្រូវបានគេរាយការណ៍ថា បានចូលរួមក្នុងដំណើរទស្សនកិច្ចនេះ ដើម្បីពិនិត្យមើលស្ថានភាពរបស់ជនជាតិប៉ាឡេស្ទីនដែលរងរបួសពីតំបន់ហ្កាហ្សា និងវាយតម្លៃកិច្ចប្រឹងប្រែង ដែលកំពុងបន្តមាន ក្នុងការផ្តល់ជំនួយដល់ដែនដីដែលត្រូវបានឡោមព័ទ្ធនេះ។

អ្នកនាង Angelina Jolie ត្រូវបានអមដំណើរដោយតំណាងក្រសួងការបរទេសសហរដ្ឋអាមេរិក ព្រមទាំងអភិបាលតំបន់ Northern Sinai និងរដ្ឋមន្ត្រីអន្តោប្រវេសន៍របស់ប្រទេសអេហ្ស៊ីប ដើម្បីចូលរួមក្នុងកិច្ចប្រឹងប្រែងមនុស្សធម៌អន្តរជាតិ និងដើម្បីគាំទ្រកិច្ចប្រឹងប្រែងរបស់អាមេរិក-អេហ្ស៊ីប ក្នុងការធានាដល់ការផ្ដល់ជំនួយ។

គួរបញ្ជាក់ថា អ្នកនាង Angelina Jolie ត្រូវបានគេស្គាល់ដោយសារកិច្ចប្រឹងប្រែងមនុស្សធម៌របស់អ្នកនាង ហើយកាលពីអតីតកាល បានបង្ហាញការប្តេជ្ញាចិត្តយ៉ាងទូលំទូលាយ ចំពោះបញ្ហាមនុស្សធម៌ នៅជុំវិញពិភពលោក។

អ្នកស្រុកហ្កាហ្សា បាននិងកំពុងប្រឈមនឹងស្ថានភាពមហន្តរាយ ដោយសារសង្គ្រាមរយៈពេល ២ឆ្នាំរបស់អ៊ីស្រាអែល នៅតំបន់នេះ ដែលបណ្តាលឲ្យមនុស្សជាង ៧០.០០០នាក់ស្លាប់ ដែលភាគច្រើនជាជនស៊ីវិល ក៏ដូចជាការបំផ្លិចបំផ្លាញហេដ្ឋារចនាសម្ព័ន្ធផងដែរ។ អេហ្ស៊ីបបានទទួលយកជនភៀសខ្លួនជាច្រើនពីតំបន់ហ្កាហ្សា តាមរយៈច្រកឆ្លងកាត់ Rafah៕