ការវិភាគរបស់សារព័ត៌មាន AFP បានបង្ហាញថា ជ័យជម្នះនៅសមរភូមិរបស់រុស្ស៊ីនៅអ៊ុយក្រែនកាលពីឆ្នាំមុនគឺខ្ពស់បំផុតចាប់តាំងពីឆ្នាំ២០២២ ខណៈទីក្រុងគីវ នឹងធ្វើជាម្ចាស់ផ្ទះទទួលទីប្រឹក្សាសន្តិសុខមកពីរដ្ឋសម្ព័ន្ធមិត្តនៅថ្ងៃសៅរ៍នេះ ទោះបីជាមានការវាយប្រហារឥតឈប់ឈររបស់ទីក្រុងមូស្គូក៏ដោយ។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ប្រទេសប្រហែល១៥ នឹងចូលរួមក្នុងកិច្ចពិភាក្សា រួមជាមួយតំណាងមកពីសហភាពអឺរ៉ុប និងសម្ព័ន្ធយោធាណាតូ ជាមួយនឹងគណៈប្រតិភូអាមេរិកដែលចូលរួមកិច្ចប្រជុំតាមរយៈតំណភ្ជាប់វីដេអូ។

កិច្ចពិភាក្សា និងកិច្ចប្រជុំកំពូលជាបន្តបន្ទាប់របស់មេដឹកនាំមកពីអ្វីដែលគេហៅថាក្រុមចម្រុះនៃឆន្ទៈដែលបានគ្រោងទុកសម្រាប់សប្តាហ៍ក្រោយនៅប្រទេសបារាំង គឺជាកិច្ចខិតខំប្រឹងប្រែងចុងក្រោយក្នុងការបញ្ចប់សង្គ្រាមរយៈពេលជិតបួនឆ្នាំមកនេះ។ លោក Zelenskyy បាននិយាយនៅក្នុងសុន្ទរកថាកាលពីថ្ងៃចូលឆ្នាំថ្មីថា កិច្ចព្រមព្រៀងសន្តិភាពដែលសម្របសម្រួលដោយសហរដ្ឋអាមេរិកគឺ «90 ភាគរយ» រួចរាល់ហើយ ទោះបីជាបញ្ហាសំខាន់នៃទឹកដីនៅតែពុំទាន់ត្រូវបានដោះស្រាយក៏ដោយ។

ការជំរុញផ្នែកការទូតនេះធ្វើឡើង ខណៈរុស្ស៊ីកំពុងដាក់សម្ពាធលើអត្ថប្រយោជន៍របស់ខ្លួនប្រឆាំងនឹងកងទ័ពអ៊ុយក្រែននៅសមរភូមិ។

យោងតាមការវិភាគទិន្នន័យពីវិទ្យាស្ថានសិក្សាសង្គ្រាម(ISW) បានឲ្យដឹងថា កងទ័ពរុស្ស៊ីបានដណ្តើមយកទឹកដីអ៊ុយក្រែនជាង ៥.៦០០ គីឡូម៉ែត្រក្រឡា ឬមានជិតមួយភាគរយ នៅឆ្នាំ ២០២៥។