មន្ត្រីបាននិយាយថា មីស៊ីលរបស់រុស្ស៊ីបានវាយប្រហារអគារលំនៅឋានច្រើនជាន់មួយកន្លែងក្នុងទីក្រុង Kharkiv ភាគឦសានប្រទេសអ៊ុយក្រែន កាលពីថ្ងៃសុក្រ ទី ២ ខែមករា បានបំផ្លាញអគារ និងបណ្តាលឲ្យមនុស្សយ៉ាងហោចណាស់ ២៥ នាក់រងរបួស។

រូបថត និងវីដេអូ ដែលបានបង្ហោះតាមបណ្តាញអ៊ីនធឺណិត បង្ហាញពីផ្សែងហុយឡើងពីតំបន់ដែលមានការបំផ្លិចបំផ្លាញយ៉ាងខ្លាំង ដោយក្រុមការងារសង្គ្រោះបន្ទាន់កំពុងធ្វើដំណើរឆ្លងកាត់គំនរបាក់បែក និងបំណែកសម្ភារៈសំណង់ធំៗ។

អភិបាលតំបន់ លោក Oleh Syniehubov បានប្រាប់ទូរទស្សន៍អ៊ុយក្រែនថា «ការវាយប្រហារដោយមីស៊ីលនៅកណ្តាលទីក្រុង Kharkiv បានបំផ្លាញលំនៅឋានប្រាំជាន់ស្ទើរតែទាំងស្រុង» ហើយយោងតាមព័ត៌មានបឋម មីស៊ីលបាលីស្ទីកពីរគ្រាប់ បានវាយប្រហារតំបន់នោះ។

«ក្រុមជួយសង្គ្រោះកំពុងស្ថិតនៅនឹងកន្លែង ដោយពួកគេភាគច្រើនកំពុងសម្អាតគំនរបាក់បែក និងស្វែងរកមនុស្សនៅខាងក្រោមនោះ»។ លោក Syniehubov និយាយថា មនុស្ស ២៥ នាក់បានរងរបួស ដែលក្នុងនោះ ១៦ នាក់កំពុងសម្រាកព្យាបាលនៅមន្ទីរពេទ្យ រួមទាំងស្ត្រីម្នាក់ស្ថិតក្នុងស្ថានភាពធ្ងន់ធ្ងរ។

ដោយមានទីតាំងស្ថិតនៅចម្ងាយ ៣០ គីឡូម៉ែត្រពីព្រំដែន ទីក្រុងKharkiv បានទប់ទល់នឹងការរុលទៅមុខរបស់រុស្ស៊ីនៅក្នុងសប្តាហ៍ដំបូងនៃការឈ្លានពានរបស់រុស្ស៊ីនៅក្នុងខែកុម្ភៈ ឆ្នាំ ២០២២ ទៅលើប្រទេសជិតខាងតូចជាងខ្លួន។ ដោយសារកងកម្លាំងរុស្ស៊ី បានផ្តោតសំខាន់លើការដណ្តើមយកតំបន់ភាគខាងកើតប្រទេស ទីក្រុងនេះបានក្លាយជាគោលដៅវាយប្រហារតាមអាកាសឥតឈប់ឈរ។