ប្រធានាធិបតីអ៊ុយក្រែន លោក Volodymyr Zelenskyy បានតែងតាំងលោក Kyrylo Budanov ប្រធានចារកម្មយោធាជានាយសេនាធិការថ្មីរបស់លោក ខណៈអ៊ុយក្រែននិងសហរដ្ឋអាមេរិក កំពុងធ្វើការលើផែនការ២០ចំណុច ដែលអាចបញ្ចប់សង្គ្រាមរបស់រុស្ស៊ី។

លោក Zelenskyy បាននិយាយនៅលើបណ្តាញX កាលពីថ្ងៃសុក្រថា «អ៊ុយក្រែន ត្រូវការការផ្តោតការយកចិត្តទុកដាក់កាន់តែខ្លាំងលើបញ្ហាសន្តិសុខ ការអភិវឌ្ឍកងកម្លាំងការពារជាតិ និងសន្តិសុខរបស់អ៊ុយក្រែន ព្រមទាំងនៅលើផ្លូវចរចាផ្នែកការទូត ហើយការិយាល័យប្រធានាធិបតីនឹងបម្រើជាចម្បងដល់ការបំពេញភារកិច្ចទាំងនេះរបស់រដ្ឋយើង»។ លោកបាននិយាយបន្ថែមថា «លោក Kyrylo មានបទពិសោធន៍ជំនាញក្នុងវិស័យទាំងនេះ និងកម្លាំងគ្រប់គ្រាន់ដើម្បីផ្តល់លទ្ធផល»។

មុខតំណែងថ្មីសម្រាប់ប្រធានចារកម្មដ៏សំខាន់របស់ក្រសួងការពារជាតិ ត្រូវបានប្រកាសក្នុងពេលដ៏សំខាន់មួយនៅក្នុងសង្គ្រាមជិតបួនឆ្នាំជាមួយរុស្ស៊ី បន្ទាប់ពីលោក Zelenskyy បានប្រកាសកាលពីថ្ងៃពុធថា កិច្ចព្រមព្រៀងសម្របសម្រួលដោយសហរដ្ឋអាមេរិកដើម្បីបញ្ចប់ជម្លោះ«៩០ភាគរយ»រួចរាល់ហើយ។

លោក Budanov ត្រូវបានកោតសរសើរចំពោះប្រតិបត្តិការដ៏ក្លាហានជាបន្តបន្ទាប់ប្រឆាំងរុស្ស៊ីចាប់តាំងពីរុស្ស៊ី បើកការវាយលុកពេញទំហឹងទៅលើអ៊ុយក្រែនក្នុងឆ្នាំ២០២២។

ជាមន្ត្រីចារកម្មយោធាអាជីព លោក Budanov បានឡើងកាន់តំណែងតាមរយៈស្ថាប័នការពារជាតិបន្ទាប់ពីការដាក់បញ្ចូលជាឧបសម្ព័ន្ធឧបទ្វីបគ្រីម៉េដោយខុសច្បាប់របស់រុស្ស៊ីក្នុងឆ្នាំ២០១៤។