ភ្នំពេញ៖ អាជ្ញាធររាជធានីភ្នំពេញ បានធ្វើការណែនាំឱ្យគណៈបញ្ជាការឯកភាពខណ្ឌទួលគោក រៀបចំសណ្តាប់ធ្នាប់សាធារណៈឲ្យបានល្អ ដោយទុករយៈពេលឱ្យអនុវត្តការងារ ក្នុងរយៈពេល១សប្តាហ៍ ដោយអនុវត្ត ចាប់ពីយប់ថ្ងៃ០៤ មិនានេះតទៅ។

កាលណែនាំពីអាជ្ញាធររាជធានីភ្នំពេញបែបនេះ បានធ្វើឡើងក្នុងកិច្ចប្រជុំបន្ទាន់មួយនារសៀលថ្ងៃទី ០៤ ខែមិនាម្សិលមិញនេះ នៅសាលាខណ្ឌគោក ក្រោមវត្តមានឯកឧត្តម មាន ចាន់យ៉ាដា អភិបាលរងរាជធានីភ្នំពេញ តំណាងឯកឧត្តម ឃួង ស្រេង អភិបាលរាជធានីភ្នំពេញ លោក ជា ពិសី អភិបាលខណ្ឌទួលគោក លោកឧត្តមសេនីយ៍ត្រី សែម គន្ធា ស្នងការរងទទួលផែនសណ្ដាប់ធ្នាប់​នៃ​ស្នងការដ្ឋាននគរបាលរាជធានីភ្នំពេញ មេបញ្ជាការរងកងរាជអាវុធហត្ថខណ្ឌទួលគោក និង​មន្ត្រីពាក់ព័ន្ធមួយចំនួនទៀត។

ឯកឧត្តម មាន ចាន់យ៉ាដា អភិបាលរងរាជធានីភ្នំពេញ មានប្រសាសន៍ថា អភិបាល​នៃគណៈអភិបាល​រាជធានី​ភ្នំពេញឯកឧត្តម ឃួង ស្រេង បានចាត់ឲ្យលោកមកបើកកិច្ចប្រជុំជា​បន្ទាន់​មួយជាមួយនឹងអាជ្ញាធរខណ្ឌទួលគោក ដើម្បីមានវិធានការទៅលើការរៀបចំ​សណ្ដាប់ធ្នាប់​លើ​បណ្ដោយមហាវិថីម៉ៅសេទុង​ ដោយចាប់ពីមហោស្រប ចេនឡា រហូតដល់សាលាសន្ធរម៉ុក ខណៈដែរតាមបណ្តោយផ្លូវនេះ ​នៅតែមានភាព​រញ៉េរញ៉ៃ​ គ្មានសណ្ដាប់ធ្នាប់ ដោយសារតែ​បងប្អូន​ប្រជាពលរដ្ឋមួយចំនួនបាន​រំលោភ​យក​ចិញ្ចឹម​ផ្លូវ ​ទ្រូង​ផ្លូវ​ធ្វើការ​លក់ដូររាល់ថ្ងៃ។

ពាក់ព័ន្ធនឹងបញ្ហា​ស្មុគស្មាញ​នេះ រដ្ឋបាលរាជធានីភ្នំពេញ ទុករយៈពេលឲ្យមួយសប្តាហ៍ ដើម្បី​ឲ្យ​អភិបាលខណ្ឌទួលគោក​ ដឹកនាំកម្លាំង ​ក្នុងការរៀបចំសណ្ដាប់ធ្នាប់នៅតាមបណ្ដោយនេះ និង​នៅតាម​ផ្លូវមួយចំនួន​ ជុំវិញផ្សារដើមគរ ​ផ្សារនាគមាស​ សំខាន់​ធ្វើយ៉ាង​ណា​ឲ្យតាមដងផ្លូវនានា មាន​សណ្ដាប់ធ្នាប់ និង​មាន​សោភ័ណភាព​ល្អ​ប្រសើរឡើងវិញ។

លោកអភិបាលរង បានបញ្ជាក់ថា កាលពីមុន​យើងប្រើពាក្យ​វែកចក ​តែពេលនេះ​មិនមែនវែកចកទេ គឺ​យើង​អង្គុយបក់ផ្សែង ។ ដូច្នេះយើងមិនអាចអង្គុយបក់ផ្សែងទៅទៀតទេ យើងត្រូវតែមាន​វិធានការ​ម៉ឹងម៉ាត់ ​និង​ទន់ភ្លន់​ដើម្បីរៀបចំសណ្តាប់ធ្នាប់តាមបណ្តោយផ្លូវនេះ ឲ្យបានល្អប្រសើរ។

លោក ជា ពិសី អភិបាលនៃគណៈអភិបាលខណ្ឌទួលគោក បានបញ្ជាក់ផងដែរថា កិច្ចការងារនេះ គណៈបញ្ជាការ​ឯកភាព​ខណ្ឌទួលគោក​បែងចែក ​ក្រុមការងារជា២ក្រុម ​ដោយក្រុមទី១ ចាប់ផ្ដើម​អនុវត្តពីម៉ោង០៩យប់រហូតដល់ម៉ោង២ទៀបភ្លឺ ​និង​មួយក្រុមទៀត ចាប់ផ្ដើម​អនុវត្តចាប់​ពី​ម៉ោង០២​ទៀបភ្លឺ រហូតដល់ម៉ោង០៧ព្រឹក ។ ការងារនេះ យើងនឹងធ្វើឲ្យដូចភ្លៀងរលឹម ដោយចាប់​អនុវត្ត​ពី​យប់​ថ្ងៃទី០៤ ខែមិនា ​ឆ្នាំ២០២២នេះតទៅ៕ អត្ថបទ៖ កុម្ភះ