រុស្ស៊ីបាននិយាយកាលពីថ្ងៃសុក្រថា កងកម្លាំងរបស់ខ្លួន បានធ្វើការវាយប្រហារច្រើនលើកលើគោលដៅអ៊ុយក្រែន ដោយប្រើអាវុធដែលមានភាពជាក់លាក់កម្រិតខ្ពស់ ក្នុងរយៈពេលមួយសប្តាហ៍កន្លងមកនេះ ខណៈដែលទីក្រុងគីវនៅថ្ងៃដដែលនោះ បានរាយការណ៍ពីការវាយបកទៅលើកងកម្លាំងរុស្ស៊ីវិញ។

យោងតាមក្រសួងការពារជាតិរុស្ស៊ី ក្នុងរយៈពេលមួយសប្តាហ៍កន្លងមកនេះ កងកម្លាំងរុស្ស៊ីបានធ្វើការវាយប្រហារលើហេដ្ឋារចនាសម្ព័ន្ធការពារជាតិ ថាមពល និងដឹកជញ្ជូនរបស់អ៊ុយក្រែន និងបានគ្រប់គ្រងកន្លែងតាំងទីលំនៅចំនួន ៩ កន្លែង នៅក្នុងទិសដៅ Donetsk, Zaporizhzhia និង Kharkiv។

នៅថ្ងៃសុក្រ អគ្គសេនាធិការនៃកងកម្លាំងប្រដាប់អាវុធអ៊ុយក្រែន បានប្រកាសថា ការប្រយុទ្ធគ្នាចំនួន ៩៨ លើក បានកើតឡើង នៅក្នុងតំបន់ជួរមុខ កាលពីថ្ងៃព្រហស្បតិ៍ ដោយកងកម្លាំងអ៊ុយក្រែនបានវាយបក ទៅលើការវាយលុកជាច្រើនរបស់រុស្ស៊ី។ អង្គភាពមីស៊ីល កងទ័ពអាកាស និងកាំភ្លើងធំរបស់អ៊ុយក្រែន បានធ្វើការវាយប្រហារប្រឆាំងនឹងគោលដៅរុស្ស៊ីយ៉ាងច្រើន។

លោក Andriy Kovalenko ប្រធានមជ្ឈមណ្ឌលប្រឆាំងព័ត៌មានក្លែងក្លាយ ក្រោមក្រុមប្រឹក្សាសន្តិសុខ និងការពារជាតិអ៊ុយក្រែន បាននិយាយកាលពីថ្ងៃសុក្រថា ការអះអាងរបស់រុស្ស៊ីអំពីការវាយប្រហារដោយដ្រូន របស់អ៊ុយក្រែនលើលំនៅឋានរបស់ប្រធានាធិបតីរុស្ស៊ីនោះ គឺជាព័ត៌មានមិនពិត និងខ្វះភស្តុតាងគួរឲ្យទុកចិត្តបាន៕