ទីភ្នាក់ងារសារព័ត៌មានប៉ាឡេស្ទីន WAFA បានរាយការណ៍ថា អ្នកតាំងលំនៅអ៊ីស្រាអែល បានបើកការវាយប្រហារជាបន្តបន្ទាប់ទៅលើសហគមន៍ប៉ាឡេស្ទីន នៅក្នុងតំបន់វេសបែង( West Bank) កាលពីថ្ងៃ សុក្រ។

ប្រភពព័ត៌មានក្នុងស្រុក ត្រូវបានដកស្រង់សម្តី ដោយបានិយាយថា ការវាយប្រហារទាំងនេះ បានកំណត់គោលដៅលើផ្ទះសម្បែង វិហារឥស្លាម និងដីកសិកម្ម ហើយត្រូវបានអមដំណើរ ឬការពារជាញឹកញាប់ដោយកងទ័ពអ៊ីស្រាអែល។

នៅក្នុងភូមិ Khalayel Al-Lawz ភាគអាគ្នេយ៍នៃទីក្រុង Bethlehem អ្នកតាំងលំនៅឋាន បានគប់ដុំថ្មទៅលើផ្ទះសម្បែងរបស់ប្រជាជន និងបានឡោមព័ទ្ធតំបន់នោះ។ ក្នុងករណីខ្លះ ដើមឈើត្រូវបានគាស់រំលើង ហើយកសិករត្រូវបានរារាំងមិនឲ្យចូលទៅក្នុងដីរបស់ពួកគេ។

របាយការណ៍នេះ បានបញ្ជាក់ថា កងកម្លាំងអ៊ីស្រាអែលបានផ្តល់ការការពារដល់អ្នកវាយប្រហារ ហើយក្នុងករណីខ្លះ បានគប់គ្រាប់បែកដៃ និងឧស្ម័នបង្ហូរទឹកភ្នែក ចូលទៅក្នុងផ្ទះសម្បែង។ យោធាក៏បានបិទតំបន់នោះ នៅពេលក្រោយផងដែរ។ នៅក្នុងការវាយប្រហារដាច់ដោយឡែកមួយនៅភូមិ Al-Jiftlik ភាគខាងជើងនៃទីក្រុង Jericho នៅភាគខាងកើតតំបន់វេសបែង សមាជិកជាច្រើននាក់នៃគ្រួសាររបស់លោក Ka’abneh ត្រូវបានអ្នកតាំងលំនៅវាយប្រហារ៕