កាលពីរសៀលថ្ងៃទី០៣ ខែមករា ឆ្នាំ២០២៦នេះ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកជំទាវ បានអញ្ជើញចុះសួរសុខទុក្ខផ្ទាល់ជាមួយវីរកងទ័ព និងវីរកងនគរបាលកម្ពុជា ដែលបានរងរបួសក្នុងសមរភូមិប្រយុទ្ធកន្លងមក ក្នុងនោះក៏មានវីរកងទ័ពប្រចាំទិសប្រាសាទព្រះវិហារ ឈ្មោះបេ សុផាត ដែលបានរងរបួសភ្នែកទាំងសងខាងធ្ងន់ធ្ងរកំពុងសម្រាកទទួលការព្យាបាលយ៉ាងយកចិត្តទុកដាក់ពីសំណាក់ក្រុមគ្រូពេទ្យ នាមន្ទីរពេទ្យព្រះអង្គដួង ។
ក្នុងគ្រាដែលវីរយុទ្ធជន បេ សុផាត កំពុងទទួលការព្យាបាលយ៉ាងយកចិត្តទុកដាក់ពីសំណាក់ក្រុមគ្រូពេទ្យជំនាញ រូបគាត់បានផ្តែផ្តាំផ្ញើតាមរយៈលោកជំទាវ លីម ដារ៉ែន ដែលជាភរិយាឯកឧត្តមជួន ណារិន្ទ គ្រាដែលលោកជំទាវ និងកូនប្រុសបានចុះទៅសួរសុខទុក្ខលើកទី១ នៅថ្ងៃទី០២ ខែមករា ឆ្នាំ២០២៦ ដោយប្រាប់ថា រូបគាត់ (បេ សុផាត) ចង់ជួប នឹងស្តាប់លឺសម្លេងឯកឧត្តម ជួន ណារិន្ទដោយផ្ទាល់ម្តងទៀតខ្លាំងណាស់ ព្រោះគាត់ធ្លាប់បានជួបមុខឯកឧត្តមផ្ទាល់បានតែម្តង គ្រាដែលឯកឧត្តមស្នងការ និងលោកជំទាវ រួមទាំងក្រុមការងារ ចុះទៅសួរសុខទុក្ខវីរកងទ័ព និងកងនគរបាលកម្ពុជានៅទិសប្រាសាទព្រះវិហារ មុនកើតមានសមរភូមិប្រយុទ្ធគ្នាជាមួយយោធាថៃ។
វីរយុទ្ធជន បេ សុផាត បានសម្តែងនូវទឹកចិត្តរំភើប និងក្តុកក្តួលក្នុងចិត្តឥតឧប្បមា ចំពោះការផ្តល់វត្តមានរបស់ ឯកឧត្តមជួន ណារិន្ទ ចុះទៅជួបរូបគាត់ផ្ទាល់តបតាមក្តីបំណង បើទោះបីជាភ្នែករបស់គាត់ទាំងសងខាងត្រូវរងរបួសធ្ងន់ធ្ងរមិនអាចមើលឃើញមុខឯកឧត្តមច្បាស់ក៏ពិតមែន តែរូបគាត់ក៏បានលឺសម្លេងរបស់ឯកឧត្តមជួន ណារិន្ទ និងលោកជំទាវយ៉ាងច្បាស់ដែលបានមានប្រសាសន៍ផ្តល់ជាកម្លាំងចិត្ត លើកទឹកចិត្តដល់រូបគាត់ ពិសេសផ្តែផ្តាំផ្ញើការសាកសួរសុខទុក្ខពីថ្នាក់ដឹកនាំកំពូលៗរបស់ជាតិ ដែលធ្វើឲ្យរូបគាត់ទទួលបានអារម្មណ៍ថា គាត់មិនបានឯកោ ឬកណ្តោយកណ្តែងនោះឡើយ គឺនៅមានប្រជាជាតិកម្ពុជា ពិសេសប្រមុខថ្នាក់ដឹកនាំប្រទេសកំពុងនៅគៀកគាត់ និងផ្តល់ភាពកក់ក្តៅឲ្យគាត់ជាទីបំផុត ។
ឯកឧត្តម ឧត្តមសេនីយ៍ឯក ជួន ណារិន្ទ បានចាត់ទុក វីរយុទ្ធជនការពារទឹកដី បេ សុផាត ជាកងទ័ពហានក្លាមួយរូប ក្នុងចំណោមកងទ័ព និងកងនគរបាលអង់អាចជាច្រើនរបស់កម្ពុជា ដែលបានពលីដោយមិនខ្លាចសូម្បីបាត់បង់អាយុជីវិតដើម្បីការពារបូរណភាពទឹកដីកម្ពុជាពីការរំលោភបំពានពីសំណាក់រដ្ឋបរទេសដទៃ ដោយការលះបង់នេះ ត្រូវបានពលរដ្ឋកម្ពុជាទូទាំងនគរ ក៏ដូចជាប្រមុខថ្នាក់ដឹកនាំរបស់ប្រទេសជាតិ មិនដែលមើលរំលងឡើយ គឺតែងតែកោតស្ញប់ស្ញែងបំផុតចំពោះវីរភាពរបស់បងប្អូនកងទ័ព ពិសេសនោះគឺការចាំបាច់ក្នុងការជួយសង្គ្រោះអាយុជីវិតកងទ័ពទាំងអស់ដែលទទួលរងរបួសក្នុងសមរភូមិប្រយុទ្ធ។
ក្នុងគ្រាជាមួយគ្នាដដែលនោះ ឯកឧត្តម ជួន ណារិន្ទ និងលោកជំទាវ លីម ដារ៉ែន បានផ្តាំផ្ញើទៅកាន់វីរយុទ្ធ បេ សុផាត និងវីរកងទ័ព ក៏ដូចជាវីរកងនគរបាលដទៃទៀតដែលឯកឧត្តម និងលោកជំទាវបានជួបសួរសុខទុក្ខ សូមសម្រាកឲ្យបានច្រើន ញុំាឲ្យបានគ្រប់គ្រាន់ ស្តាប់តាមវេជ្ជបញ្ជារបស់ក្រុមគ្រូពេទ្យឲ្យបានត្រឹមត្រូវ និង សូមជូនពរឲ្យបងប្អូនឆាប់ជាសះពីរបួស ដើម្បីឆាប់បានវិលត្រឡប់ទៅលំនៅឋានជួបជុំក្រុមគ្រួសារវិញ នៅពេលខាងមុខ ៕ លីហេង
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
