មន្ត្រីជាន់ខ្ពស់របស់វ៉េណេស៊ុយអេឡា បានប្រកាសកាលពីថ្ងៃអាទិត្យ (៤ មករា) ថា រដ្ឋាភិបាលរបស់ប្រទេសនេះ នឹងនៅតែរួបរួមគ្នា ឈរនៅពីក្រោយលោកប្រធានាធិបតី Nicolas Maduro ដែលត្រូវបានសហរដ្ឋអាមេរិក ចាប់ខ្លួន នៅក្នុងជំហានមួយដែលបានបង្កឱ្យមានភាពមិនប្រាកដប្រជាយ៉ាងខ្លាំងអំពីអ្វីដែលនឹងកើតឡើងបន្ទាប់សម្រាប់ប្រទេសអាមេរិកខាងត្បូងសម្បូរទៅដោយប្រេងមួយនេះ។

ពេលនេះ លោក Maduro កំពុងស្ថិតក្នុងមណ្ឌលឃុំឃាំងមួយនៅទីក្រុងញូវយ៉ក រង់ចាំការចូលបង្ហាញខ្លួននៅតុលាការនាថ្ងៃចន្ទ ទី០៥ ខែមករា នេះ (ពេលវេលានៅសហរដ្ឋអាមេរិក) ពីបទចោទប្រកាន់ទាក់ទងនឹងគ្រឿងញៀន។ ប្រធានាធិបតីអាមេរិក លោក Donald Trump បានបញ្ជាឱ្យចាប់ខ្លួនលោក Maduro ពីវ៉េណេស៊ុយអេឡា កាលពីថ្ងៃសៅរ៍កន្លងទៅ ហើយលោកក៏បាននិយាយថា សហរដ្ឋអាមេរិកនឹងគ្រប់គ្រងប្រទេសនេះ។

ប៉ុន្តែនៅទីក្រុងការ៉ាកាស ក្រុមមន្ត្រីជាន់ខ្ពស់នៅក្នុងរដ្ឋាភិបាលរបស់លោក Maduro -- ដែលបានហៅការឃុំខ្លួនលោក Maduro និងភរិយារបស់លោកគឺលោកស្រី Cilia Flores ថាជាការចាប់ជំរិត -- នៅតែទទួលបន្ទុកគ្រប់គ្រងប្រទេសនេះ។

រដ្ឋមន្ត្រីក្រសួងមហាផ្ទៃវ៉េណេស៊ុយអេឡា លោក Diosdado Cabello បាននិយាយក្នុងសារសំឡេងមួយថា៖ «នៅទីនេះ ការរួបរួមនៃកម្លាំងបដិវត្តន៍ គឺត្រូវបានធានាលើសពីការរំពឹងទុក ហើយនៅទីនេះ មានប្រធានាធិបតីតែមួយរូបគត់ ឈ្មោះថា Nicolas Maduro Moros»។ អនុប្រធានាធិបតីវ៉េណេស៊ុយអេឡា លោកស្រី Delcy Rodriguez បានឡើងកាន់តំណែងជាមេដឹកនាំបណ្ដោះអាសន្ន ដោយមានការអនុញ្ញាតពីតុលាការកំពូលរបស់ប្រទេសនេះ ប៉ុន្តែលោកស្រីបានបញ្ជាក់ថា លោក Maduro នៅតែជាប្រធានាធិបតីវ៉េណេស៊ុយអេឡាជានិច្ច៕