កូរ៉េខាងជើង បានបាញ់សាកល្បងមីស៊ីលលឿនជាងសំឡេងរបស់ខ្លួន កាលពីថ្ងៃអាទិត្យកន្លងទៅ ដើម្បីវាយតម្លៃសមត្ថភាពប្រតិបត្តិការយោធាទីក្រុងព្យុងយ៉ាង ទាក់ទងនឹងការទប់ស្កាត់សង្គ្រាម នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋ KCNA នៅថ្ងៃចន្ទ (៥ មករា) នេះ។

សេចក្ដីរាយការណ៍បន្តថា មេដឹកនាំកូរ៉េខាងជើង គីម ជុងអ៊ុន ដែលបានត្រួតពិនិត្យការបាញ់មីស៊ីលនេះ បាននិយាយថា «នេះជាយុទ្ធសាស្ត្រដ៏សំខាន់មួយ ដើម្បីរក្សាឬពង្រីកការទប់ស្កាត់នុយក្លេអ៊ែរដ៏រឹងមាំ និងអាចទុកចិត្តបាន» ដោយសារ «វិបត្តិភូមិសាស្ត្រនយោបាយថ្មីៗនេះ និងកាលៈទេសៈអន្តរជាតិផ្សេងៗ»។

KCNA និយាយថា មីស៊ីលទាំងនោះបានវាយប្រហារគោលដៅនៅចម្ងាយប្រហែល ១ពាន់គីឡូម៉ែត្រ ពីលើសមុទ្រភាគខាងកើតរបស់កូរ៉េខាងជើង។ កាលពីថ្ងៃអាទិត្យ យោធាកូរ៉េខាងត្បូងនិយាយថា កូរ៉េខាងជើងបានបាញ់មីស៊ីលបាលីស្ទិកឆ្ពោះទៅសមុទ្រខាងកើតរបស់ខ្លួន ស្របពេលលោកប្រធានាធិបតីកូរ៉េខាងត្បូង Lee Jae Myung បានចាប់ផ្តើមដំណើរទស្សនកិច្ចផ្លូវរដ្ឋទៅកាន់ប្រទេសចិន។

កូរ៉េខាងជើង ធ្លាប់បាញ់មីស៊ីលល្បឿនលឿនជាងសំឡេងបែបនេះកាលខែតុលា ឆ្នាំ២០២៥ ដែលក្រុមអ្នកវិភាគសន្មតថា ត្រូវបានដាក់បង្ហាញក្នុងក្បួនដង្ហែយោធា រួមជាមួយនឹងមីស៊ីលអន្តរទ្វីបរយៈចម្ងាយឆ្ងាយផ្សេងទៀត។ អ្នកវិភាគនិយាយថា របបទីក្រុងព្យុងយ៉ាងកំពុងសង្កត់ធ្ងន់លើសមត្ថភាពរបស់ខ្លួន ក្នុងការបាញ់មីស៊ីលបែបនេះនៅពេលណាក៏បាន ដែលជាកិច្ចប្រឹងប្រែងមួយដើម្បីធ្វើឱ្យប្រព័ន្ធការពារមីស៊ីលរបស់សហរដ្ឋអាមេរិក-កូរ៉េខាងត្បូង មានភាពស្មុគស្មាញ និងរារាំងការស្ទាក់ចាប់ជាមុន៕