ប្រធានាធិបតីវ៉េណេស៊ុយអេឡា លោក Nicolás Maduro ត្រូវបានកំណត់ពេលឱ្យចូលបង្ហាញខ្លួនជាលើកដំបូង ក្នុងតុលាការសហព័ន្ធអាមេរិកនៅថ្ងៃចន្ទ ទី៥ ខែមករា ឆ្នាំ២០២៦នេះ (ពេលវេលានៅសហរដ្ឋអាមេរិក) បន្ទាប់ពីត្រូវបានចាប់ខ្លួនកាលពីថ្ងៃសៅរ៍កន្លងទៅ ក្នុងប្រតិបត្តិការយោធាអាមេរិកដ៏គួរឱ្យភ្ញាក់ផ្អើលមួយនៅទីក្រុងការ៉ាកាស។

ឥឡូវនេះ លោកកំពុងរង់ចាំការកាត់ក្តីនៅទីក្រុងញូវយ៉ក លើបទចោទព្រហ្មទណ្ឌសហព័ន្ធ រួមទាំងការឃុបឃិតផ្នែកភេរវកម្មគ្រឿងញៀន និងការឃុបឃិតនាំចូលកូកាអ៊ីន។ សវនាការនេះត្រូវបានគ្រោងនឹងធ្វើឡើងនៅវេលាម៉ោងក្នុងស្រុក ១២ថ្ងៃត្រង់ នៅក្នុងសាលាក្តីសហព័ន្ធក្នុងតំបន់ Manhattan ទីក្រុងញូវយ៉ក នៅចំពោះមុខចៅក្រមប្រចាំតំបន់របស់សហរដ្ឋអាមេរិក គឺលោក Alvin K. Hellerstein។

ភរិយារបស់លោក Maduro គឺលោកស្រី Cilia Flores ក៏ត្រូវបានចាប់ខ្លួនយោធាសហរដ្ឋអាមេរិក ហើយក៏កំពុងប្រឈមនឹងបទចោទប្រកាន់ព្រហ្មទណ្ឌសហព័ន្ធផងដែរ រួមទាំងការឃុបឃិតគ្នានាំចូលកូកាអ៊ីនដូចគ្នានោះ។ កាលពីថ្ងៃសៅរ៍ រដ្ឋមន្ត្រីក្រសួងយុត្តិធម៌អាមេរិក លោកស្រី Pam Bondi បាននិយាយក្នុងសារបង្ហោះមួយលើប្រព័ន្ធផ្សព្វផ្សាយសង្គមថា លោក Maduro និងលោកស្រី Flores «នឹងប្រឈមមុខនឹងកំហឹងពេញលេញរបស់យុត្តិធម៌អាមេរិក ឆាប់ៗនេះ លើទឹកដីអាមេរិក ក្នុងតុលាការអាមេរិក»។

រដ្ឋអាជ្ញាបានចោទប្រកាន់មេដឹកនាំវ៉េណេស៊ុយអេឡារូបនេះ ពីបទឧក្រិដ្ឋសហព័ន្ធក្នុងឆ្នាំ២០២០ ពោលគឺក្នុងអំឡុងពេលអាណត្តិដំបូងរបស់លោកប្រធានាធិបតីអាមេរិក Donald Trump នៅក្នុងការចោទប្រកាន់ដែលនៅពេលនោះ លោក Maduro បានបដិសេធ។ ក្រសួងយុត្តិធម៌អាមេរិក ចោទប្រកាន់លោក Maduro និងមេដឹកនាំវ៉េណេស៊ុយអេឡាដទៃទៀត — ក្នុងចំណោមឧក្រិដ្ឋកម្មផ្សេងទៀត — ពីបទប្រើប្រាស់តំណែងរបស់ពួកគេនៅក្នុងរដ្ឋាភិបាល ដើម្បីសម្រួលដល់ការនាំចូលកូកាអ៊ីន ចូលទៅក្នុងទឹកដីសហរដ្ឋអាមេរិក ក្នុងពេលជាងពីរទសវត្សរ៍មកហើយ៕