ប្រធានាធិបតីអាមេរិក លោក Donald Trump បានលើកឡើងថា រូបលោកមិនជឿនោះទេ ដែលថា ការវាយប្រហារដោយអ៊ុយក្រែន ដែលទីក្រុងមូស្គូបានចោទប្រកាន់ ទៅលើនិវេសនដ្ឋានរបស់លោកប្រធានាធិបតី Vladimir Putin ពិតជាបានកើតឡើងដូចដែលរុស្ស៊ី បានអះអាងនោះ។

ថ្លែងប្រាប់អ្នកយកព័ត៌មានកាលពីថ្ងៃអាទិត្យ (៤ មករា) នៅលើយន្តហោះ Air Force One ក្នុងដំណើរត្រឡប់ទៅទីក្រុងវ៉ាស៊ីនតោនវិញ លោក Trump បាននិយាយថា “ខ្ញុំមិនជឿថាការវាយប្រហារនោះបានកើតឡើងទេ ... មានអ្វីមួយបានកើតឡើងនៅក្បែរនោះមែន ប៉ុន្តែមិនមានអ្វីពាក់ព័ន្ធនឹងរឿងនេះទេ”។

គួររម្លឹកថា កាលពីថ្ងៃចន្ទសប្ដាហ៍មុន រដ្ឋាភិបាលទីក្រុងមូស្គូ បានចោទប្រកាន់ទីក្រុងគីវ ថាបានព្យាយាមវាយប្រហារនិវេសនដ្ឋានរបស់លោក Putin នៅក្នុងតំបន់ Novgorod ភាគខាងជើងប្រទេសរុស្ស៊ី ជាមួយនឹងយានដ្រូនចម្ងាយឆ្ងាយចំនួន ៩១គ្រឿង ហើយក៏បាននិយាយថា រុស្ស៊ីនឹងពិនិត្យឡើងវិញនូវជំហរចរចារបស់ខ្លួន ក្នុងកិច្ចពិភាក្សាដែលកំពុងបន្តជាមួយសហរដ្ឋអាមេរិក ស្តីពីការបញ្ចប់សង្គ្រាមអ៊ុយក្រែន។ ទាំងអ៊ុយក្រែន និងបណ្តាប្រទេសលោកខាងលិច បានច្រានចោលការចោទប្រកាន់នោះ៕