អ្នកគាំទ្ររដ្ឋាភិបាលរាប់ពាន់នាក់បានចេញធ្វើបាតុកម្មនៅដងផ្លូវក្នុងទីក្រុង Caracas កាលពីថ្ងៃអាទិត្យ ទី ៤ ខែមករា ដោយបង្ហាញការទាមទាររបស់ពួកគេសម្រាប់ការវិលត្រឡប់របស់លោកប្រធានាធិបតី Nicolas Maduro ដែលកាលពីថ្ងៃសៅរ៍ ទី៣ ខែមករា ត្រូវបានចាប់ និងនាំខ្លួនចេញពីប្រទេសដោយសហរដ្ឋអាមេរិក។

អ្នកចូលរួម ដែលមួយចំនួនមានកាន់កាំភ្លើងវែង និងបដា មានរូបភាពរបស់លោក Maduro បានស្រែកពាក្យស្លោកដូចជា «វ៉េណេស៊ុយអេឡាជាមួយ Nicolas» ដោយបង្ហាញភក្ដីភាពចំពោះមេដឹកនាំ និងភរិយារបស់លោក គឺ លោកស្រី Cilia Flores។

ប្រធានាធិបតីសហរដ្ឋអាមេរិក Donald Trump បាននិយាយថា សហរដ្ឋអាមេរិកបានវាយប្រហារប្រទេសវ៉េណេស៊ុយអេឡា និងចាប់ខ្លួនលោក Maduro ក្នុងប្រតិបត្តិការមួយកាលពីយប់ថ្ងៃសៅរ៍ ដោយសន្យាថានឹងដាក់ប្រទេសនេះឱ្យស្ថិតនៅក្រោមការគ្រប់គ្រងរបស់សហរដ្ឋអាមេរិកសម្រាប់នាពេលនេះ រួមទាំងការដាក់ពង្រាយកងកម្លាំងអាមេរិកប្រសិនបើចាំបាច់។

ក្រុមអ្នកតវ៉ាបានពិពណ៌នាអំពីប្រតិបត្តិការដើម្បីចាប់ខ្លួនលោក Maduro ថាជាការរំលោភលើសន្តិសុខ និងដែនអធិបតេយ្យភាពរបស់ប្រទេសវ៉េណេស៊ុយអេឡា។

ក្រុមអ្នកតវ៉ាក៏បានបដិសេធការបង្ខំឲ្យទទួលយករដ្ឋាភិបាលដែលជ្រើសរើសដោយសហរដ្ឋអាមេរិក។ លោក Maduro កំពុងស្ថិតនៅក្នុងមណ្ឌលឃុំឃាំងមួយកន្លែងក្នុងទីក្រុងញូវយ៉ក រង់ចាំការបង្ហាញខ្លួននៅតុលាការនៅថ្ងៃចន្ទ ទី៥ ខែមករានេះ លើការចោទប្រកាន់ពីបទគ្រឿងញៀន។