មេដឹកនាំប្រទេសដាណឺម៉ាក និងដែនដី Greenland កាលពីថ្ងៃអាទិត្យ ទី៤ ខែមករា បានជំរុញឱ្យប្រធានាធិបតីសហរដ្ឋអាមេរិក លោក Donald Trump បញ្ឈប់ការគំរាមកំហែងដណ្តើមយកដែនដី Greenland បន្ទាប់ពីលោកបានបញ្ជាក់ជាថ្មីនូវបំណងរបស់លោកក្នុងការធ្វើដូច្នេះ នៅក្នុងបទសម្ភាសន៍ជាមួយទស្សនាវដ្តី The Atlantic។ «វាពិតជាមិនសមហេតុផលនោះទេក្នុងការនិយាយអំពីសហរដ្ឋអាមេរិកដែលចាំបាច់ត្រូវដណ្តើមយកដែនដី Greenland។

នាយករដ្ឋមន្ត្រីដាណឺម៉ាកលោកស្រី Mette Frederiksen បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា សហរដ្ឋអាមេរិក ពុំមានសិទ្ធិដាក់បញ្ចូលជាឧបសម្ព័ន្ធដែនដីណាមួយក្នុងចំណោមដែនដីរបស់ដាណឺម៉ាកទេ»។

លោក Trump បានប្រាប់ទស្សនាវដ្តីនេះថា «យើងពិតជាត្រូវការដែនដី Greenland។ យើងត្រូវការវាសម្រាប់ការពារជាតិ»។ លោកបានថ្លែងមួយថ្ងៃបន្ទាប់ពីសហរដ្ឋអាមេរិកបានចាប់ខ្លួនប្រធានាធិបតីវ៉េណេស៊ុយអេឡាលោក Nicolas Maduro ហើយលោកប្រធានាធិបតីបាននិយាយថាទីក្រុងវ៉ាស៊ីនតោននឹងគ្រប់គ្រងប្រទេសអាមេរិកឡាទីនមួយនេះ។ នេះបានធ្វើឱ្យមានការព្រួយបារម្ភនៅក្នុងប្រទេសដាណឺម៉ាកថា រឿងដដែលនេះអាចកើតឡើងជាមួយដែនដី Greenland ដែលជាទឹកដីរបស់ប្រទេសដាណឺម៉ាក។