នគរបាលបាននិយាយកាលពីថ្ងៃអាទិត្យ (៤ មករា) ថា មនុស្សទាំង ៤០នាក់ ដែលបានស្លាប់នៅក្នុងអគ្គិភ័យដ៏កំណាចនៅក្លឹបកម្សាន្ត (បារ) នៃរមណីយដ្ឋានជិះស្គីដ៏ល្បីល្បាញនៅប្រទេសស្វីស ក្នុងថ្ងៃចូលឆ្នាំសកល ត្រូវបានកំណត់អត្តសញ្ញាណអស់ហើយ ដោយជនរងគ្រោះជាក្មេងជំទង់ មានចំនួនជាងពាក់កណ្តាលនៃអ្នកស្លាប់សរុប។

នគរបាលតំបន់ Valais បាននិយាយថា ជនរងគ្រោះចុងក្រោយចំនួន ១៦នាក់ក្នុងចំណោមតួលេខសរុប ត្រូវបានកំណត់អត្តសញ្ញាណរួចរាល់ បន្ទាប់ពីអគ្គិភ័យនៅរមណីយដ្ឋានតំបន់ភ្នំ Crans-Montana នៅថ្ងៃទី១ ខែមករា ឆ្នាំ២០២៦។ អគ្គិភ័យនេះគឺជាគ្រោះមហន្តរាយដ៏អាក្រក់បំផុតមួយក្នុងប្រវត្តិសាស្ត្រស្វីសថ្មីៗនេះ ហើយទិវាកាន់ទុក្ខជាតិនឹងត្រូវប្រារព្ធឡើងក្នុងពេលឆាប់ៗ។

មនុស្សរាប់រយនាក់បាននាំគ្នាធ្វើក្បួនដង្ហែដោយស្ងៀមស្ងាត់ ឆ្លងកាត់ដងផ្លូវក្រោមអាកាសធាតុដ៏ត្រជាក់ខ្លាំងនៃទីក្រុង Crans-Montana កាលពីថ្ងៃអាទិត្យកន្លងទៅ ដើម្បីរំលឹកដល់ជនរងគ្រោះនៃអគ្គិភ័យនោះ ដែលក៏បានធ្វើឱ្យមនុស្សជាង ១០០នាក់ រងរបួសផងដែរ។

នគរបាលស្វីសនិយាយថា ជនរងគ្រោះប្រហែល ២៦នាក់ ក្នុងចំណោមអ្នកស្លាប់សរុបទាំង ៤០នាក់ គឺជាក្មេងវ័យជំទង់ ដោយអ្នកទាំងនោះក៏រួមមាន ជនជាតិបារាំងអាយុ ១៤ ឆ្នាំម្នាក់ និងក្មេងអាយុ ១៤ឆ្នាំម្នាក់ មកពីស្វីស ប៉ុន្តែសេចក្ដីថ្លែងការណ៍នេះមិនបានចេញផ្សាយឈ្មោះជនរងគ្រោះណាម្នាក់ឡើយ៕