ប្រធានាធិបតីអាមេរិក លោក ដូណាល់ ត្រាំ ( Donald Trump) បានថ្លែងថា សហរដ្ឋអាមេរិកឥឡូវនេះកំពុងគ្រប់គ្រងប្រទេសវ៉េណេស៊ុយអេឡាប្រកបដោយប្រសិទ្ធភាព។

លោក ត្រាំ បានប្រាប់អ្នកយកព័ត៌មានថា៖«យើងកំពុងដោះស្រាយជាមួយមនុស្សដែលទើបតែស្បថចូលកាន់តំណែង ហើយកុំសួរខ្ញុំថា អ្នកណាជាអ្នកទទួលបន្ទុកប្រទេសនេះ ព្រោះខ្ញុំនឹងផ្តល់ចម្លើយដល់អ្នក ហើយវានឹងមានភាពចម្រូងចម្រាសយ៉ាងខ្លាំង»។ ដើម្បីឆ្លើយតបទៅនឹងសំណួរបន្ត មេដឹកនាំអាមេរិករូបនេះ បាននិយាយថា៖«យើងទទួលបន្ទុកប្រទេសវ៉េណេស៊ុយអេឡា»។ លោកបានពន្យល់ថា លោកមិនបានទាក់ទងផ្ទាល់ជាមួយអនុប្រធានាធិបតីវ៉េណេស៊ុយអេឡា លោកស្រី Delcy Rodriguez ដែលកំពុងធ្វើជាប្រមុខរដ្ឋនោះទេ ប៉ុន្តែបានកត់សម្គាល់ថា៖«លោកស្រីកំពុងសហការ» ជាមួយសហរដ្ឋអាមេរិក។

កាលពីថ្ងៃទី ០៣ ខែមករា រដ្ឋមន្ត្រីការបរទេសវ៉េណេស៊ុយអេឡា លោក Yvan Gil Pinto បាននិយាយថា សហរដ្ឋអាមេរិកបានវាយប្រហារគោលដៅស៊ីវិល និងយោធា នៅក្នុងទីក្រុងការ៉ាកាស។ លោកបានហៅសកម្មភាពរបស់ទីក្រុងវ៉ាស៊ីនតោនថា ជាការឈ្លានពានដោយយោធា។ ស្ថានភាពគ្រាអាសន្ន ត្រូវបានប្រកាស នៅក្នុងប្រទេសនេះ។ ប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា ប្រទេសរបស់លោក បានបើកការវាយប្រហារទ្រង់ទ្រាយធំលើវ៉េណេស៊ុយអេឡា។ យោងតាមលោក ត្រាំ លោក ម៉ាឌូរ៉ូ និងភរិយារបស់ខ្លួន ត្រូវបានចាប់ខ្លួន និងនាំចេញពីប្រទេសនេះ៕