ប្រធានាធិបតីកូឡុំប៊ី លោក Gustavo Petro កាលពីថ្ងៃអាទិត្យ (ទី៤ ខែមករា ឆ្នាំ២០២៦) បានច្រានចោលការគំរាមកំហែងរបស់សមភាគីអាមេរិក លោក Donald Trump ដែលក៏បានចោទប្រកាន់លោកផងដែរថា ជាអ្នកជួញដូរគ្រឿងញៀន។

កងកម្លាំងអាមេរិកបានវាយប្រហារទីក្រុងការ៉ាកាស កាលពីព្រឹកព្រលឹមថ្ងៃទី៣ ខែមករា ដោយទម្លាក់គ្រាប់បែកលើគោលដៅយោធា អំឡុងពេលមានការវាយឆ្មក់ចាប់ខ្លួនភ្លាមៗយ៉ាងឆាប់រហ័សដ៏គួរឲ្យភ្ញាក់ផ្អើល ដើម្បីទម្លាក់មេដឹកនាំវ៉េណេស៊ុយអេឡា លោក Nicolas Maduro ពីអំណាច និងអះអាងនូវការគ្រប់គ្រងរបស់ទីក្រុងវ៉ាស៊ីនតោនលើប្រទេសអាមេរិកខាងត្បូងដែលសម្បូរដោយប្រេងមួយនេះ។

ហើយអំឡុងពេលថ្លែងទៅកាន់អ្នកសារព័ត៌មាន នៅលើយន្តហោះ Air Force One កាលពីថ្ងៃទី៤ ខែមករា លោក Trump បានធ្វើការគំរាមកំហែងស្រដៀងគ្នា ក្នុងការមានវិធានការយោធាប្រឆាំងនឹងកូឡុំប៊ី ដោយនិយាយថា ប្រទេសនៅអាមេរិកខាងត្បូងមួយនេះ គឺ «អាក្រក់ធ្ងន់ធ្ងរណាស់» និង «គ្រប់គ្រងដោយបុគ្គលទុច្ចរិតដែលចូលចិត្តផលិតកូកាអ៊ីន ហើយលក់វាទៅសហរដ្ឋអាមេរិក»។ 

នៅពេលត្រូវបានសួរថា តើអន្តរាគមន៍យោធាស្រដៀងគ្នានឹងវ៉េណេស៊ុយអេឡា ជិតកើតមាននៅប្រទេសកូឡុំប៊ីដែរ ឬទេ មេដឹកនាំទៅគណបក្សសាធារណរដ្ឋ បានឆ្លើយតបថា៖ «ខ្ញុំមិនប្រកែកឡើយ ចំពោះគំនិតនេះ»។ លោក Trump បានអះអាងដោយគ្មានភស្តុតាងថា៖ «អ្នកដឹងថាហេតុអ្វីទេ ព្រោះពួកគេសម្លាប់មនុស្សជាច្រើននាក់»។

យ៉ាងណាក្ដី លោក Petro បានច្រានចោលការចោទប្រកាន់នេះ ដោយបញ្ជាក់ថា «ឈ្មោះរបស់លោក មិនមាននៅក្នុងកំណត់ហេតុរបស់តុលាការទេ»។ លោក Petro បានលើកឡើងនៅលើវេទិកាបណ្ដាញសង្គម X ថា៖ «លម្មឈប់ប្រើពាក្យសម្ដីបង្កាច់បង្ខូចខ្ញុំទៅ លោក Trump។ នោះមិនមែនជាវិធីដែលអ្នកអាចគំរាមកំហែងបានឡើយ ចំពោះប្រធានាធិបតីអាមេរិកឡាទីនដែលកើតចេញពីការតស៊ូប្រដាប់អាវុធ និងដែលបន្ទាប់មកមកចេញពីការប្រយុទ្ធរបស់ប្រជាជនកូឡុំប៊ី ដើម្បីសន្តិភាព»។

លោក Petro បានរិះគន់ដោយឥតសំចៃ ចំពោះវិធានការយោធារបស់រដ្ឋបាល លោក Trump នៅក្នុងតំបន់ ហើយបានចោទប្រកាន់ក្រុងវ៉ាស៊ីនតោនថា បានចាប់ពង្រត់លោក Maduro ដោយគ្មានមូលដ្ឋានច្បាប់។ នៅក្នុងការបង្ហោះក្រោយមក នៅលើបណ្ដាញសង្គម X កាលពីថ្ងៃទី៤ ខែមករា លោក Petro បានបន្ថែមថា «មិត្តកុំបំផ្លាញគ្នា»៕