លទ្ធផលផ្លូវការដែលចេញផ្សាយចុងក្រោយ បានបង្ហាញនៅថ្ងៃចន្ទ (ទី៥ ខែមករា ឆ្នាំ២០២៦) នេះថា គណបក្សគាំទ្រយោធាដ៏លេចធ្លោរបស់សហភាពមីយ៉ាន់ម៉ា គឺ USDP (គណបក្សសម្ព័ន្ធភាព និងអភិវឌ្ឍន៍ ) បានឈ្នះដំណាក់កាលទី១ នៃការបោះឆ្នោតដែលរៀបចំដំណើរការដោយរបបយោធា ដោយទទួលបានអាសនៈសភាជាន់ទាបជិត ៩០ភាគរយ។

យោធាបានធ្វើរដ្ឋប្រហារឆ្នាំ២០២១ ដែលបានទម្លាក់រដ្ឋាភិបាលប្រជាធិបតេយ្យរបស់លោកស្រី អ៊ុងសាន ស៊ូជី (Aung San Suu Kyi) ប៉ុន្តែកំពុងមើលខុសត្រូវការបោះឆ្នោតជាដំណាក់កាលរយៈពេល ១ខែ ដែលខ្លួនសន្យាថា នឹងប្រគល់អំណាចជូនប្រជាជនវិញ។

អ្នកការទូតលោកខាងលិច និងអ្នកតស៊ូមតិលទ្ធិប្រជាធិបតេយ្យ បានច្រានចោលការបោះឆ្នោតនេះ ដោយចាត់ទុកថា គ្រាន់តែជាការរៀបចំ ដើម្បីធ្វើឲ្យមានរូបភាពថ្មីនៃការគ្រប់គ្រងរបស់យោធាប៉ុណ្ណោះ ដោយលើកឡើងពីការដាក់ពន្ធនាគារលោកស្រី អ៊ុងសាន ស៊ូជី ការរំលាយគណបក្សរបស់លោកស្រី ការបង្ក្រាបលើអ្នកប្រឆាំង និងសន្លឹកឆ្នោតដែលមានសុទ្ធតែបេក្ខជនជាសម្ព័ន្ធមិត្តរបស់យោធា។

បើយោងតាមការបូកសរុបលទ្ធផលផ្លូវការរបស់សារព័ត៌មាន ដែលចេញផ្សាយតាំងពីថ្ងៃសុក្រសប្ដាហ៍មុន រហូតដល់ថ្ងៃចន្ទនេះ បានបង្ហាញឲ្យឃើញថា គណបក្សសម្ព័ន្ធភាព និងអភិវឌ្ឍន៍ (USDP) ដែលគាំទ្រយោធា ទទួលបាន ៨៩អាសនៈ ក្នុងចំណោមអាសនៈសភាជាន់ទាបចំនួន ១០២ ដែលមាននៅក្នុងដំណាក់កាលទី១។

ជ័យជម្នះរបស់គណបក្ស USDP ស្មើនឹងជាង ៨៧ភាគរយនៃអាសនៈសភាជាន់ទាបដែលមាននៅក្នុងដំណាក់កាលដំបូងនៃការបោះឆ្នោតកាលពីថ្ងៃទី២៨ ខែធ្នូឆ្នាំមុន ដោយសំឡេងឆ្នោតនៅសល់ភាគច្រើនធា្លក់ទៅលើគណបក្សតូចៗដែលតំណាងឲ្យជនជាតិភាគតិច។ លទ្ធផលសរុប ត្រូវបានកំណត់ប្រកាសបន្ទាប់ពីការបោះឆ្នោតដំណាក់កាលទី៣ និងចុងក្រោយដែលគ្រោងធ្វើនៅថ្ងៃទី២៥ ខែមករា៕