នាយករដ្ឋមន្ត្រីហុងគ្រី លោក Viktor Orban នៅថ្ងៃចន្ទ (ទី៥ ខែមករា ឆ្នាំ២០២៦) នេះ បានលើកឡើងថា ការសម្រេចរបស់សហរដ្ឋអាមេរិក ក្នុងការផ្តួលរំលំមេដឹកនាំវ៉េណេស៊ុយអេឡា លោក Nicolas Maduro គួរតែមានផលវិជ្ជមានទៅលើទីផ្សារថាមពលពិភពលោក ដោយលោកបានបន្ថែមថា សហរដ្ឋអាមេរិក និងវ៉េណេហ្ស៊ុយអេឡា នឹងគ្រប់គ្រងរហូតដល់ពាក់កណ្តាលនៃធនធានប្រេងបម្រុងរបស់ពិភពលោក។

ជាអន្តរាគមន៍ដ៏ធំបំផុតរបស់សហរដ្ឋអាមេរិក នៅតំបន់អាមេរិកឡាទីន គិតចាប់តាំងពីមានការលុកលុយ នៅប្រទេសប៉ាណាម៉ា ឆ្នាំ១៩៨៩ កងកម្លាំងពិសេសបានវាយលុកចូលក្រុងការ៉ាកាសតាមឧទ្ធម្ភាគចក្រ កាលពីចុងសប្តាហ៍កន្លងទៅ ហើយបានចាប់ខ្លួន លោក Maduro មុនពេលនាំររូបលោកទៅទីក្រុង New York ដើម្បីឲ្យប្រឈមនឹងការកាត់ទោសពីការចោទប្រកាន់ ពាក់ព័ន្ធនឹងគ្រឿងញៀន។

ក្នុងនាមជាសម្ព័ន្ធមិត្តរបស់លោក Orban ប្រធានាធិបតីសហរដ្ឋអាមេរិក លោក Donald Trump ដែលបានលើកលែងប្រទេសហុងគ្រីពីការដាក់ទណ្ឌកម្មរបស់សហរដ្ឋអាមេរិក ជុំវិញការទិញថាមពលរុស្ស៊ី សម្រាប់ឆ្នាំបោះឆ្នោតហុងគ្រី ២០២៦ បានបញ្ជាក់យ៉ាងច្បាស់ថា លោកចង់ឲ្យមានការចែករំលែកផលប្រយោជន៍ពីធនធានប្រេងរបស់ប្រទេសវ៉េណេស៊ុយអេឡា។

នៅឯសន្និសីទសារព័ត៌មានប្រចាំឆ្នាំ សម្រាប់ប្រព័ន្ធផ្សព្វផ្សាយអន្តរជាតិ លោក Orban បាននិយាយថា៖ «អ្វីដែលខ្ញុំគិតថា សំខាន់ សម្រាប់ហុងគ្រីពីករណីនេះ គឺថា រួមជាមួយប្រទេសវ៉េណេស៊ុយអេឡា សហរដ្ឋអាមេរិក តាមការប៉ាន់ស្មានរបស់ខ្ញុំ នឹងអាចគ្រប់គ្រងបានពី ៤០-៥០ភាគរយរយនៃធនធានប្រេងបម្រុងរបស់ពិភពលោក»។

លោកបានបន្ថែមថា៖ «នេះគឺជាសមត្ថភាពដ៏ខ្លាំងរួចហើយ ក្នុងការមានឥទ្ធិពលលើតម្លៃទីផ្សារថាមពលពិភពលោក។ ខ្ញុំឃើញឱកាសដ៏រឹងមាំមួយ ដែលថា ដោយសារធ្វើឲ្យវ៉េណេស៊ុយអេឡាស្ថិតក្រោមការគ្រប់គ្រង ស្ថានភាពថាមពលសកលអំណោយផលជាងនេះ នឹងលេចឡើង សម្រាប់ហុងគ្រី ហើយនោះគឺជាដំណឹងល្អ»៕