អ្នកវិភាគនិយាយនៅថ្ងៃចន្ទនេះថា កូរ៉េខាងជើងអាចប្រើប្រាស់ស្ថានភាពនៅវេណេស៊ុយអេឡា ដើម្បីបង្ហាញភាពត្រឹមត្រូវនៃតម្រូវការសម្រាប់ការតាមប្រម៉ាញ់កម្មវិធីនុយក្លេអ៊ែររបស់ខ្លួន ។

ទីភ្នាក់ងារព័ត៌មានរដ្ឋកូរ៉េខាងជើង KCNA រាយការណ៍នៅថ្ងៃចន្ទនេះថា មេដឹកនាំរបស់ខ្លួនលោក Kim Jong Un និយាយថា ព្រឹត្តិការណ៍ថ្មីៗនៅលើឆាកអន្តរជាតិ ទាមទារឲ្យប្រទេសរបស់លោក ពង្រឹងកម្លាំងទប់ស្កាត់ការវាយប្រហារដោយនុយក្លេអ៊ែររបស់ខ្លួន ខណៈពេលកំពុងសង្កេតមើលសមយុទ្ធបាញ់មីស៊ីលល្បឿនលឿនជាងសំឡេងរបស់កងទ័ពប្រជាជនកូរ៉េ កាលពីថ្ងៃទី ០៤ ខែមករាម្សិលមិញ ។

ទីភ្នាក់ងារ KCNA រាយការណ៍ដោយដកស្រង់សម្តីលោក Kimថា ការពង្រឹងកម្លាំងទប់ស្កាត់ការវាយប្រហារដោយនុយក្លេអ៊ែរ គឺត្រូវបានតម្រូវជាចំាបាច់ ដោយសារតែវិបត្តិភូមិសាស្ត្រនយោបាយចុងក្រោយបំផុត និងព្រឹត្តិការណ៍អន្តរជាតិដ៏ស្មុកស្មាញ ។ លោកបន្តថា គោលបំណងនៃសមយុទ្ធនេះគឺ ដើម្បីវាយតម្លៃការត្រៀមខ្លួនប្រយុទ្ធនៃប្រព័ន្ធអាវុធល្បឿនលឿនជាងសំឡេង និងប្រសិទ្ធភាព និងការចល័តនៃកម្លាំងការពាររបស់កូរ៉េខាងជើង ។

លោក Yang Moo-jin គឺជាសាស្រ្តាចារ្យនៅសាកលវិទ្យាល័យសិក្សាកូរ៉េខាងជើង និយាយថា ចូរក្រឡេកមើលស្ថានភាពនៅវេណេស៊ុយអេឡា កូរ៉េខាងជើងទំនងជាប្រើប្រាស់វា ដើម្បីទទួលបានភាពត្រឹមត្រូវសម្រាប់តម្រូវការជំរុញបន្ថែមទៀតកម្លាំងនុយក្លេអ៊ែររបស់ពួកគេ ។

យោធាកូរ៉េខាងត្បូង និយាយកាលពីថ្ងៃអាទិត្យថា កូរ៉េខាងជើង បានបាញ់មីស៊ីលបាលីស្ទិកឆ្ពោះទៅកាន់សមុទ្រនៅភាគខាងកើតរបស់ខ្លួន ស្របពេលប្រធានាធិបតីកូរ៉េខាងត្បូងលោក Lee Jae Myung ចាប់ផ្តើមដំណើរទស្សនកិច្ចផ្លូវរដ្ឋទៅកាន់ប្រទេសចិន ដែលជាសម្ព័ន្ធមិត្តចាក់ទឹកមិនលិចរបស់កូរ៉េខាងជើង ។

លោក Yang និយាយថា កូរ៉េខាងជើង ចង់ឆ្លុះបញ្ចាំងដល់ក្រុមមេដឹកនាំកូរ៉េខាងត្បូង និងចិនថា ពួកគេគួរតែកុំពិភាក្សាលើការរំសាយអាវុធនុយក្លេអ៊ែររបស់កូរ៉េខាងជើង ៕