យោងតាមប្រភពដែលដឹងពីបញ្ហានេះ បាននិយាយនៅថ្ងៃចន្ទ (៥ មករា) ថា រដ្ឋបាលលោកប្រធានាធិបតីអាមេរិក Donald Trump កំពុងមានគម្រោងជួបប្រជុំជាមួយបណ្ដានាយកប្រតិបត្តិមកពីក្រុមហ៊ុនប្រេងអាមេរិក នាចុងសប្តាហ៍នេះ ដើម្បីពិភាក្សាអំពីការជំរុញផលិតកម្មប្រេងរបស់វ៉េណេស៊ុយអេឡា បន្ទាប់ពីកងកម្លាំងអាមេរិក បានបណ្តេញមេដឹកនាំរបស់ខ្លួនគឺលោក Nicolas Maduro ចេញពីតំណែង។

កិច្ចប្រជុំទាំងនេះមានសារៈសំខាន់ណាស់ចំពោះក្តីសង្ឃឹមរបស់រដ្ឋបាលទីក្រុងវ៉ាស៊ីនតោន ក្នុងការនាំក្រុមហ៊ុនប្រេងកំពូលៗរបស់សហរដ្ឋអាមេរិក ត្រឡប់ទៅកាន់ប្រទេសអាមេរិកខាងត្បូងនេះវិញ បន្ទាប់ពីរដ្ឋាភិបាលទីក្រុងការ៉ាកាស កាលពីជិតពីរទសវត្សរ៍មុន បានយកប្រតិបត្តិការថាមពលដឹកនាំដោយសហរដ្ឋអាមេរិកនៅទីនោះ មកគ្រប់គ្រង។

ក្រុមហ៊ុនប្រេងធំជាងគេទាំង៣ របស់អាមេរិក - មានដូចជា ក្រុមហ៊ុន Exxon Mobil ក្រុមហ៊ុន ConocoPhillips និងក្រុមហ៊ុន Chevron - មិនទាន់បានធ្វើកិច្ចសន្ទនាណាមួយជាមួយរដ្ឋបាលអាមេរិកនៅឡើយទេ អំពីបញ្ហាលោក Maduro នោះ នេះបើយោងតាមប្រភពពីនាយកប្រតិបត្តិឧស្សាហកម្មប្រេងចំនួន ៤រូប។ ការលើកឡើងរបស់ប្រភពផ្ទៃក្នុងជាន់ខ្ពស់ទាំងនេះគឺផ្ទុយនឹងសេចក្តីថ្លែងការណ៍របស់លោក Trump កាលពីចុងសប្តាហ៍កន្លងទៅ ដែលថា លោកបានជួបជាមួយក្រុមហ៊ុនប្រេងអាមេរិក «ទាំងអស់» រួចទៅហើយ ទាំងមុនពេល និងចាប់តាំងពីពេលលោក Maduro ត្រូវបានចាប់ខ្លួន។

កិច្ចប្រជុំដែលកំណត់ទុកនាពេលខាងមុខនេះ នឹងមានសារៈសំខាន់ខ្លាំងណាស់ចំពោះក្តីសង្ឃឹមរបស់រដ្ឋបាលអាមេរិក ក្នុងការជំរុញផលិតកម្មប្រេងឆៅ និងការនាំចេញពីវ៉េណេស៊ុយអេឡា ដែលជាអតីតសមាជិកអង្គការប្រទេសនាំចេញប្រេង OPEC ហើយស្ថិតនៅលើកំពូលតារាងនៃទុនបំរុងប្រេងធំជាងគេបំផុតរបស់ពិភពលោក ខណៈធុងប្រេងរបស់ប្រទេសនេះ អាចចម្រាញ់បានដោយរោងចក្រចម្រាញ់ប្រេងរបស់សហរដ្ឋអាមេរិក ដែលរចនាឡើងជាពិសេស។ ក្រុមអ្នកវិភាគនិយាយថា ការសម្រេចគោលដៅនោះនឹងត្រូវធ្វើការងាររាប់ឆ្នាំ និងការវិនិយោគតម្លៃរាប់ពាន់លានដុល្លារ៕