ប៉េតង់៖ ឯកឧត្តម សុខ សប្បាយណា អគ្គលេខាធិការសហព័ន្ធកីឡាប៊ូល និងប៉េតង់កម្ពុជាបានវាយតម្លៃខ្ពស់ ចំពោះសមិទ្ធផលសម្រេចបានរបស់កីឡាករ-កីឡាការិនីក្នុងការប្រកួតកីឡាប៉េតង់ជ្រើសរើសជើងឯកថ្នាក់ជាតិឆ្នាំ២០២១ បន្ទាប់ពីឆ្លងកាត់ការប្រកួតដ៏ស្វិតស្វាញរយៈពេល ៣ថ្ងៃចាប់ពីថ្ងៃទី០៤ ដល់ថ្ងៃទី០៦ ខែមីនា ឆ្នាំ២០២២។
ឯកឧត្តមបានថ្លែងក្នុងពិធីបិទការប្រកួតថា ក្រោយឆ្លងកាត់ការប្រកួតចម្រាញ់រកជើងខ្លាំងប្រចាំតំបន់ទាំង ៥ មកប្រកួតផ្ដាច់ព្រ័ត្រក្នុងជើងឯកថ្នាក់ជាតិឆ្នាំនេះ សហព័ន្ធសង្កេតឃើញមានការកើនឡើងនូវគុណផល បច្ចេកទេស វិន័យ និងឆន្ទៈ ដែលឆ្លុះបញ្ចាំងឲ្យឃើញពីការអភិវឌ្ឍនៃវិស័យកីឡាប៉េតង់ទូទាំងប្រទេស ទោះបីស្ថិតក្នុងបរិបទកូវីដ-១៩ ក៏ដោយ។ តាមរយៈនេះ អគ្គលេខាធិការសហព័ន្ធដដែលបានលើកទឹកចិត្តដល់កីឡាករ-កីឡាការិនីគ្រប់រូប ទាំងអ្នកដណ្ដើមបានជ័យលាភី និងមិនទទួលបានជ័យលាភីត្រូវខិតខំអភិវឌ្ឍន៍សមត្ថភាពបន្ថែម ដើម្បីដុសខាត់សមត្ថភាពឲ្យកាន់តែខ្លាំងក្លា ដើម្បីមានឱកាសប្រកួតប្រជែងដណ្ដើមជ័យលាភីនាថ្ងៃអនាគត ហើយមានឱកាសប្រកួតតំណាងជាតិ និងដណ្ដើមមេដាយលើឆាកអន្ដរជាតិជូនជាតិផងដែរ។
សូមបញ្ជាក់ថា ការប្រកួតកីឡាប៉េតង់ជើងឯកថ្នាក់ជាតិឆ្នាំ២០២១ បានចម្រាញ់កីឡាករ-កីឡាការិនីឆ្នើមៗលេខ១ និងលេខ២ មកពីការប្រកួតតាមតំបន់ទាំង ៥ សរុបចំនួន ១៨៩នាក់ដើម្បីធ្វើការប្រកួតប្រជែងជើងឯកថ្នាក់ជាតិលើ ៦វិញ្ញាសា ដែលពិធីបើកការប្រកួតបានធ្វើឡើងនៅទីលាន នៃវិទ្យាស្ថានជាតិអប់រំកាយ និងកីឡា មុនពិធិបិទការប្រកួតផ្លូវការនៅទីលានសាកលវិទ្យាល័យភូមិន្ទភ្នំពេញកាលពីម្សិលមិញ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
