ព្រិលធ្លាក់យ៉ាងក្រាស់ឃ្មឹកក្នុងរដូវរងា បានរំខានដល់ការធ្វើដំណើរតាមផ្លូវអាកាស ផ្លូវគោក និងផ្លូវដែកនៅប្រទេសអឺរ៉ុបជាច្រើន រួមទាំងបារាំង និងហូឡង់ កាលពីថ្ងៃចន្ទ និងបន្តចូលដល់ថ្ងៃអង្គារ (៦ មករា) នេះ ខណៈជើងហោះហើររាប់រយជើងត្រូវលុបចោល ក្នុងរដ្ឋធានីប្រទេសទាំងពីរ ដោយរថភ្លើងជុំវិញទីក្រុងអាំស្ទែរដាំ បានឈប់ដំណើរការ ចំណែកសេវាកម្មរថយន្តក្រុងនៅប៉ារីស ត្រូវបានផ្អាក។  

អាកាសយានដ្ឋានអាំស្ទែរដាំ Schiphol ដែលជាមជ្ឈមណ្ឌលមមាញឹកបំផុតមួយរបស់អឺរ៉ុប បានលុបចោលជើងហោះហើរប្រហែល ៧០០ជើង កាលពីថ្ងៃចន្ទ។ នៅថ្ងៃអង្គារនេះ ព្រិលនិងទឹកកកបានបន្តរំខានចរាចរណ៍នៅហូឡង់ ដែលធ្វើឱ្យរថភ្លើងទាំងអស់នៅតែបន្តផ្អាក និងបង្ខំឱ្យលុបចោលជើងហោះហើររាប់រយជើងបន្ថែមទៀត។ ក្រុមហ៊ុនផ្លូវដែកហូឡង់ NS និយាយថា ពុំមានរថភ្លើងណាមួយអាចដំណើរការបានទេសម្រាប់ពេលនេះ ដោយសារបញ្ហាមកពីព្រិល និងសីតុណ្ហភាពក្រោមសូន្យ។

ទន្ទឹមនឹងនេះ អាជ្ញាធរអាកាសចរណ៍ស៊ីវិលរបស់បារាំង កាលពីថ្ងៃចន្ទ បានស្នើឱ្យក្រុមហ៊ុនអាកាសចរណ៍កាត់បន្ថយការហោះឡើង និងចុះចតនៅអាកាសយានដ្ឋានធំៗមួយចំនួនដើម្បីសុវត្ថិភាព នេះបើយោងតាមប្រតិបត្តិករហោះហើរទីក្រុងប៉ារីស។

សំណុំទឹកកក និងព្រិលក៏បានបណ្តាលឱ្យមានការពន្យារពេល និងគ្រោះថ្នាក់ជាច្រើនទៀតលើដងផ្លូវ ទោះបីជាអាជ្ញាធរបានណែនាំប្រជាជនឱ្យស្នាក់នៅផ្ទះឱ្យច្រើនដែលអាចធ្វើទៅបានក៏ដោយ។ ការពន្យារពេល និងការរំខានបន្ថែមទៀតនៅតំបន់អឺរ៉ុប ត្រូវបានគេរំពឹងទុកនៅក្នុងប៉ុន្មានថ្ងៃខាងមុខនេះ ដោយសារតែអាកាសធាតុរដូវរងាដែលកំពុងបន្ត៕