ប្រធានាធិបតីទួរគីលោក រ៉េសិប តាយីប អឺដូហ្កាន់ ( Recep Tayyip Erdogan) បាននិយាយកាលពីថ្ងៃចន្ទថា លោកបានប្រាប់ប្រធានាធិបតីអាមេរិកលោក ដូណាល់ ត្រាំ ថា៖«ប្រទេសវ៉េណេស៊ុយអេឡា មិនគួរត្រូវបានអូសទាញចូលទៅក្នុងអស្ថិរភាពនោះទេ»។

លោក អឺដូហ្កាន់ បានថ្លែងនៅក្នុងសន្និសីទសារព័ត៌មានមួយ បន្ទាប់ពីកិច្ចប្រជុំគណៈរដ្ឋមន្ត្រីថា៖«យើងមិនអត់ឱនចំពោះសកម្មភាពណាមួយដែលរំលោភលើភាពស្របច្បាប់ផ្នែកនយោបាយ និងច្បាប់អន្តរជាតិ នៅគ្រប់ទីកន្លែង ក្នុងពិភពលោកទេ»។

លោកបានសង្កត់ធ្ងន់ថា៖«ការរំលោភលើសិទ្ធិអធិបតេយ្យភាពរបស់ប្រទេសនានា និងច្បាប់អន្តរជាតិ គឺជាជំហានដ៏ប្រថុយប្រថាន ដែលអាចនាំឲ្យមានផលវិបាកធ្ងន់ធ្ងរដល់សកលលោក»។

លោក អឺដូហ្គាន់ បានបន្តទៀតថា៖«នៅក្នុងការសន្ទនាតាមទូរស័ព្ទរបស់យើងជាមួយប្រធានាធិបតីអាមេរិក លោក ដូណាល់ ត្រាំ យើងក៏បានបង្ហាញពីការព្រួយបារម្ភរបស់ប្រទេសយើង ទៅកាន់លោកផងដែរ។ យើងបានគូសបញ្ជាក់ថា ប្រទេសវ៉េណេស៊ុយអេឡាមិនគួរត្រូវបានអូសទាញចូលទៅក្នុងអស្ថិរភាពនោះទេ» ដោយសំដៅទៅលើការសន្ទនាតាមទូរស័ព្ទដែលលោកបានធ្វើជាមួយលោក ត្រាំ កាលពីព្រឹកថ្ងៃចន្ទ។

លោកបាននិយាយថា៖«ទាក់ទងនឹងប្រទេសវ៉េណេស៊ុយអេឡា យើងកំពុងខិតខំធ្វើអ្វីដែលល្អបំផុត និងត្រឹមត្រូវ ទាំងសម្រាប់ប្រទេសទួរគី និងសម្រាប់ប្រជាជនវ៉េណេស៊ុយអេឡាដែលរួសរាយរាក់ទាក់» ដោយបន្ថែមថា ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) និងប្រជាជននៃប្រទេសនេះ តែងតែជាមិត្តភក្តិរបស់ប្រទេសទួរគី»៕