មន្ត្រីគុយបាកាលពីថ្ងៃចន្ទ បានទម្លាក់ទង់ជាតិចុះមុនពេលថ្ងៃរះ ដើម្បីកាន់ទុក្ខមន្ត្រីសន្តិសុខចំនួន ៣២នាក់ដែលពួកគេនិយាយថា ត្រូវបានសម្លាប់នៅក្នុងការវាយប្រហារចុងសប្តាហ៍មុនរបស់សហរដ្ឋអាមេរិក នៅក្នុងប្រទេសវ៉េណេស៊ុយអេឡា ដែលជាសម្ព័ន្ធមិត្តជិតស្និទ្ធបំផុតរបស់ប្រទេសកោះនេះ ខណៈដែលប្រជាជននៅទីនេះឆ្ងល់ថាតើការចាប់ខ្លួនលោកប្រធានាធិបតី នីកូឡាស ម៉ាឌូរ៉ូ (Nicolás Maduro) មានន័យយ៉ាងណាចំពោះអនាគតរបស់ពួកគេ។

រដ្ឋាភិបាលទាំងពីរមានភាពជិតស្និទ្ធគ្នាខ្លាំងណាស់ ដែលទាហាន និងភ្នាក់ងារសន្តិសុខគុយបាជារឿយៗ គឺជាអង្គរក្សរបស់ប្រធានាធិបតីវ៉េណេស៊ុយអេឡា ហើយប្រេងឥន្ធនៈរបស់ប្រទេសវ៉េណេស៊ុយអេឡា បានធ្វើឲ្យកោះដែលមានសេដ្ឋកិច្ចខ្សោយនេះ បន្តដំណើរការទៅមុខអស់រយៈពេលជាច្រើនឆ្នាំ។ អាជ្ញាធរគុយបាកាលពីចុងសប្តាហ៍មុន បាននិយាយថា មនុស្ស ៣២នាក់ ត្រូវបានសម្លាប់នៅក្នុងការវាយប្រហារដោយមិនបានរំពឹងទុក ប៉ុន្តែមិនបានផ្តល់ព័ត៌មានលម្អិតបន្ថែមទេ។

រដ្ឋបាលលោក ត្រាំ បានព្រមានយ៉ាងច្បាស់ថា ការផ្តួលរំលំលោក ម៉ាឌូរ៉ូ នឹងជួយជំរុញគោលដៅរយៈពេលមួយទសវត្សរ៍ទៀត៖ ការធ្វើឲ្យចុះខ្សោយគួរឲ្យកត់សម្គាល់នូវអំណាច ស្ថិរភាព ឬឥទ្ធិពលរបស់រដ្ឋាភិបាលគុយបា។ ការកាត់ផ្តាច់ប្រទេសគុយបាចេញពីប្រទេសវ៉េណេស៊ុយអេឡា អាចមានផលវិបាកដ៏មហន្តរាយសម្រាប់មេដឹកនាំរបស់ខ្លួន ដែលកាលពីថ្ងៃសៅរ៍ បានអំពាវនាវឲ្យសហគមន៍អន្តរជាតិក្រោកឈរឡើងប្រឆាំងនឹង «ភេរវកម្មរដ្ឋ»។

កាលពីថ្ងៃសៅរ៍ លោក ត្រាំ បាននិយាយថា សេដ្ឋកិច្ចគុយបាដែលកំពុងចុះខ្សោយ នឹងត្រូវរងការខូចខាតបន្ថែមទៀត ដោយការបណ្តេញលោក ម៉ាឌូរ៉ូ ចេញពីអំណាច៕