គណៈកម្មការអឺរ៉ុបបានបដិសេធមិនកំណត់លក្ខណៈសកម្មភាពរបស់សហរដ្ឋអាមេរិក នៅប្រទេសវ៉េណេស៊ុយអេឡា ហើយបាននិយាយថា វា «លឿនពេក» ក្នុងការវាយតម្លៃថាតើប្រតិបត្តិការនេះ បានរំលោភលើច្បាប់អន្តរជាតិឬអត់។

លោកស្រី Paula Pinho ប្រធានអ្នកនាំពាក្យគណៈកម្មការអឺរ៉ុប បានថ្លែងនៅក្នុងសន្និសីទសារព័ត៌មានមួយ នៅទីក្រុងប្រ៊ុចសែលថា៖«យើងមិនទាន់បានពិភាក្សាគ្នាពីរបៀបដែលយើងកំពុងហៅសកម្មភាពនេះ នៅឡើយទេ។ ខ្ញុំមិនគិតថា នេះគឺជាបញ្ហាពាក់ព័ន្ធបំផុតទេ។ ព្រឹត្តិការណ៍ទាំងនេះ បង្កើតឱកាសសម្រាប់ការផ្លាស់ប្តូរប្រជាធិបតេយ្យ នៅប្រទេសវ៉េណេស៊ុយអេឡាដែលដឹកនាំដោយប្រជាជនវ៉េណេស៊ុយអេឡា»។

លោកស្រី Anitta Hipper អ្នកនាំពាក្យជាន់ខ្ពស់ទទួលបន្ទុកគោលនយោបាយការបរទេស និងសន្តិសុខ ដែលបានថ្លែងជាមួយលោកស្រី Pinho បានបន្ថែមថា៖«វាលឿនពេកក្នុងការពិនិត្យមើល និងវាយតម្លៃផលវិបាកទាក់ទងនឹងការវាយតម្លៃផ្នែកច្បាប់»។

គណៈកម្មការអឺរ៉ុបក៏បានបដិសេធមិនធ្វើអត្ថាធិប្បាយអំពីថាតើខ្លួនថ្កោលទោសចំពោះការស្លាប់របស់ជនស៊ីវិល បន្ទាប់ពីសកម្មភាពរបស់សហរដ្ឋអាមេរិកឬអត់នោះទេ៕